عن الاسلام ناسٍ يا وجيه الخير مرتــــــــده !!!!!!!

[علي فلاح العضياني]

ياعتيبه عزوتي يا رياجيل الفعايل
انتم اهل السيف والرمح والخيل الاصايل
لا تصير اعلومكم بين قيل وبين قايل= ولعوها نار والنار من شبابها

؛؛؛؛؛؛؛؛؛؛؛؛؛؛؛؛؛
ألا يالله ياربي تثبتنا على الاسلام= عن الاسلام ناسٍ يا وجيه الخير مرتده
نبا عبدالعزيز يقوم فالميدان واليا قام=عتيبي كان عندك علم قدام الملا عده




وسلامتكم

[مرزوق حمدان العتيبي]

....
كــــــــــــلام يابو فلاح
لله درك على هالمبدا المسكت
وينك ياعبــــد العزيز....
اثق تمام الثقه ان هذه المحاوره ستكون مميزه .
تحياتي

[عايض الحبابي]

ياسلام يابو فلاح ..مبدا رائع لايستغرب من شاعر مثلك ...

ومادام المحاوره طرفيها الفالح ... وعبدالعزيز ..

أجل أنتظروا محاوره من العيار الثقيل ..

تحيااااااتي

[علي فلاح العضياني]

هلا وغلا باساتذة فن شعر المحاوره مــــــــرزوق العتيبي وعــــــــــايض الحبابي

وجودكم ومروركم يعطي المحاوره حلاوتها نكهتها الحقيقيه لا تقاطعوننا

ونحن في انتظار الشاعر الاسطوره عبدالعزيز

تقبلوا تحيات الفالح

[ماجد الهذلي]

الله الله

مبدى راااائع يالفالح

وبدايه قويه ننتظر عبد العزيز

متااااابع

[معقل المجانين]

ياعتيبه عزوتي يـا رياجيـل الفعايـل
انتم اهل السيف والرمح والخيل الاصايل
لا تصير اعلومكم بين قـيـل وبـيـن قايــل
ولعوها نـار والنـار مـن شبابهـا

ألا يالله ياربـي تـثـبـتـنــا علـى الاسـلام @@ عن الاسلام ناسٍ يا وجيه الخير مرتده

نبا عبدالعزيز يقوم فالميدان واليا قام @@ عتيبي كان عندك علم قدام الملا عده

الفالح والنعم والله كفو بدون قصورفالجميع
متابع
منتظرين قدوم الشاعر / عبدالعزيز

تحياتي

[عبدالعزيز بن جودان الرويس]

ارحب يالفالح
وارحب يامرزوق
وارحب يالحبابي
وارحب ياماجد
وارحب يامعقل المجنن
تواجدكم وتشجيعكم دافع قوي للمحاوره
لا هنتو على التواجد

[عبدالعزيز بن جودان الرويس]

استلم يالفالح
واعذرني على التاخير


ياعتابه ياهل الطيب والمد الجزيلي= الله اللي حطكم تلطمون اللي يعيلي
وانت يالفالح كلامك مرتب ياعميلي= ولعوها نار والنار من شبابها
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,
على الاسلام حنا مانزل الشرع والاحكام=ومن يجهل بشرع الله ويكفر لارحم جده
وانا لاقمت يالفالح مقامي يسقم الاخصام=ارد الخصم عن مايشتهي بالفعل واحتده

[الــوآفــي]

محاوره ستكون رائعه بلاشك

كيف لا وهي بين عملاقين

الفالح وعبدالعزيز

الروعه في تواجدكم معا

صحت السنتكم

وانا مع مرزوق انها ستكون مميزه

ذيبان

[ماجد الهذلي]

الليل الليل ياعبد العزيز ويا الفالح

يا سلااااام يا سلام

متااابعكم واصلوا

[الفراهيدي]

الله الله الله

مبدى راااائع يالفالح

ورد راااااااائع يا عبد العزيز

[((الدلبحي))]

الفالح قاف متميز كصاحبه

تسلم ويسلم عبدالعزيز ومحاوره قويه من البدايه

تحيااااااااااااااتي

[عبدالعزيز بن جودان الرويس]

ذيبان لا هنت
شكرا على مرورك


ماجد متابعتك
تعطي المحاوره رونق خاص
شكرا لك



الفراهيدي
لاهنت على مرورك
تحياتي لك


الدلبحي
تسلم على مرورك
تحياتي لك

[علي فلاح العضياني]

ليش يالطيب تسوي على ربعك كذيا
وانت ابن عمي ولا شفت في راسك حميا
يوم خيل الضيط تبرى لخيل ابن محيا=ولعوها نار والنار من شبابها
؛؛؛؛؛؛؛؛؛؛؛؛؛؛؛؛؛؛؛؛؛؛

انا ياصاحبي شكيت في مللتك قبل ايام=تكب الواجب وتنقد على اللي واجبه سده


ورى ما قمت يومك مختبي فالقبو مع صدام= ترى صدام قبلك مختبي فالقبو له مده

[الحر الأشقر]

الفالح لا هنت وبيض الله وجهك يا شعلة المنتدى

عبد العزيز لا هنت وبيض الله وجهك ودائماً مبدع


محاورات جزله بين شاعرين لا يحتاجون إلى تعريف فهم قطبين من اقطاب الشعر واصلوا لا هنتوا وحنا معكم



أخوكم/ الحر الأشقر

[علي فلاح العضياني]

ماجد
ذيبان
الدلبحي
معقل الجن
الفراهيدي

الحر الاشقر
شاكرين ومقدرين مروركم وكلامكم الطيب اللذي لا يستغرب


تقبلو تحيات الفالح

[عبدالعزيز بن جودان الرويس]

الله الله

انت يومنك تروح وتخش العلم عني= ليه ماعلمتني ثم تشوف الفعل مني
مير انا واثق بفعلك ولا خيبت ظني= ولعوها نار والنار من شبابها
,,,,,,,,,,,,,,
انا ماكب ماجوبي وفي وقت القا مقدام=وخصمي مايقفي لين احط الوسم في خده
ترا ماني بمتخبي واظن اللي غزا ينلام=عليك اللوم كان انك من اللي عدو العده
=

[عبدالعزيز بن جودان الرويس]

الحر الاشقر لاهنت
شكرا على مرورك
تحياتي لك

[علي فلاح العضياني]

استلم



كان ما عندك عذر غير هذا ما انت غادي
اثر يوم انك توخرت ترقب للمنادي
والخبر مذيوع من حين وقته فالروادي=ولعوها نار والنار من شبابها
؛؛؛؛؛؛؛؛؛؛؛؛؛؛؛؛؛؛؛؛؛
عتيبه يا عتيبه لا يضيع الماقف اللزام=عزايمنا ليا قمنا تهز الضلع وتهده
ترى كل السباع النمر تخشى هيبة الضرغام= وانا ما ودي ابطش بك لحيث انك من البده

[المسرّي]

الله الله

مبدعين مبدعين
طاروووووووق ناجح


والله يكفينا شر من فيه شر

[ماجد الهذلي]

يا سلام يا سلام متابع

والله شعار كبار

[عبدالعزيز بن جودان الرويس]

كان نار الملعبه جالها صلو ولهيبي=مابغيت ايصير في وسطها غير الغريبي
والله اني مابغيت اذبح بسيفي عتيبي= ولعوها نار والنار من شبابها
,,,,,,,,,,
انا قد قلت لك مالك ومال الشك والاوهام=ولا شفت لك رجالٍ بصفك لاتقف ضده
ابو ليلى المهلهل مابغا يذبحك ياهمام=ولكنك تعرضله واظنك مانته بقده

[عبدالعزيز بن جودان الرويس]

لا هنت يالمسري
شكرا على تواجدك
والنجاح بحضورك
تحياتي













لاهنت ياماجد
تسلم

[مرزوق حمدان العتيبي]

...
نقول ابــــــــــداع مايكفي ... انا اقول اكثر من كذا
واصلوا ياشعراءنا المميزين ..
تحياتي

[قرنــاس الصبيحي]

ياســـــــــــــــــــــــــــــــــــــــــــــــ ـــلاااااااااااااااااااااااااااااااااام على القاف الراااااااااااائع


صح لسانك ياعبدالعزيز وصح لسانك يافالح

[علي فلاح العضياني]

اقنع انك يالعتيبي تمشيها عليه
لا تحوص يمين ويسار وتكب القضيه
وان شعمت النار يمكن تصير انت الضحيه=ولعوها نار والنار من شبابها
؛؛؛؛؛؛؛؛؛؛؛؛؛؛؛؛؛؛؛؛؛
هل التوحيد ياعبدالعزيز اتكسر الاصنام=نعرف الطيب الاصلي فالمجالس فايحٍ نده


ابوليلى ليا جا ما قفه ما ينثني عزام=وبعده عنك من بحر الخليج اليا بحر جده

[مرزوق حمدان العتيبي]

...
شعراء كبار
ولعب اخر حلاووه...
لله دركم ....
المتابعه والاعجاب
منّـــــــــــــــي ..

[علي فلاح العضياني]

والله ما ابرك من المحاوره اللي تمرها يامرزوق وتشارك فيها


والله لايهينك

الفالح

[عبدالعزيز بن جودان الرويس]

انت يالفالح علومك تروع من سمعها=راضعلك خلفةٍ ماحدٍ قبلك رضعها
وكان ماطاعتك الايام يابن الناس طعها= ولعوها نار والنار من شبابها
,,,,,,,,,,,,,,,,,
اشوف الطير يالفالح على راس المجوخ حام=وانا بديت فعل الطيب وانته طالبك بده
يقولون العرب من يظلم اهل المعرفه ينظام=وترا بحر العرب مايختلف جزره ولا مده

[علي فلاح العضياني]

انت وش علمك كلامك يابوماجد ملفق
واحدٍ هاذي علومك ترى مانت متوفق
مار اخذ مني نصيحه على روحك ترفق=ولعوها نار والنار من شبابها
؛؛؛؛؛؛؛؛؛؛؛؛؛؛؛؛؛
ليا منك بغيت الطيبه ياصاحبي قدام=ترا بعض العرب فالطيب لا هاته؛؛ ولا؛؛ وده

انا ما اظلم ومن يظلم عليه من الجليل آثام= وكلٍ يالعتيبي لابسٍ ثوبه على قده

[عبدالعزيز بن جودان الرويس]

الملفق عند غيري وانا جبت الحقايق= جبت لك علمٍ وعندي على علمي وثايق
لد عينك فالعرب ثم تمقل فالخلايق= ولعوها نار والنار من شبابها
,,,,,,,,,,,,,,,,,,
عتيبي والعتيبي في بحر جود العرب عوام= يشد الحبل لامن الخصم فالمعركه شده
انا مابيك تلبس ثوب يالفالح بدون اكمام= ابا كلفك بالواجب وقدمي واجبك اده

[عبدالعزيز بن جودان الرويس]

الفالح صح لسانك يابو فلاح
واعذرني على التاخير
لكن الظروف احكمت
صح لسانك ياعملاق تحياتي لك وشكري

[مرزوق حمدان العتيبي]

صحت السنتكم..
جزاله وشكاله لاهنتم ...

[أحمد المالكي]

الفالح

ماشاء الله عليك

كنت ولازلت كما عهدتك

المهم اتمنى تكون في احسن حال

وعبدالعزيز صح لسانك
وماقصرت

وبالتوفيق