حبيب العازمي وسلطان الجلاوي والمعنى تركي 2000 !!! [الأرشيف] - الهيـــــــــــــلا *** منتدى قبيلة عتيبة

مشاهدة النسخة كاملة : حبيب العازمي وسلطان الجلاوي والمعنى تركي 2000 !!!

ابو فايح

13-Nov-2010, 12:41 AM

الاسبوع الماضي كانت هناك حفله في الطائف وتفاصيلها على هذا الرابط

http://www.otaibah.net/m/showthread.php?t=117816

من أفضل طواريق الحفل كان طاروق الجلاوي وحبيب العازمي

ظهر إبداع الجلاوي وطريقة طرحه للمعنى والإستمرار فيه ونقض أبيات حبيب العازمي بشكل رائع
وظهر ابو فيصل في قمة عنفوانه وإبداعه الشعري ومن أبياته يتضح أنه ناوي على نيه ستزلزل الساحه .

يدور المعنى في أحداث حفلة تركي 2000 وحبيب العازمي وإعتذار حبيب العازمي عن الرد على موال تركي 2000 في تلك الحفله و ما دعى الجلاوي لطرح ذلك المعنى هو حصول أحداث جديده سيتم الحديث عنها في وقتها .

ملاحظه : من بعض الأبيات يتبين أن المعنى في أمر قبلي جديد ولكن لا اعتقد ذلك .

سلطان الجلاوي

يا حبيب طال عمرك سامع(ن) قصه جديده = بين سكان الجبال وبين سكان الصحاري
خابرك بين العرب ما عشت في عيشه زهيده= وش حدك يوم تبحث لك على مخرج طواري

حبيب العازمي

كان فيها مشكله ناد المجله والجريده = وأنت داري والعرب مافيه واحد معك داري
من يجيه الشر قسمه والمعافى الله يزيده = ماعلي من المجنن لو تصدم فالكباري

سلطان الجلاوي

أنت لو شاورتني بجيك بالأرياء السديده = قدم تسري ............. في جنح الغداري
العرب في دربها والله يدبر ما يريده = والبلا من ضحكة الحربي ومن ضحك المطاري

حبيب العازمي

الرقاب العوج تعدلها السيوف اللي حديده = فالصحيح عن ابن ماجه والصحيح عن البخاري
لو نخون العهد ما كنا على نهج العقيده =وأنت ابن مشيب معك خبره على طعن الشباري

سلطان الجلاوي

يا بن عاصي لا تقول السالفه صارت مكيده = وش تسوي يا حبيب عقب ما تجري الجواري
كيف تجحدها وشاهدها عبيدي من عبيده = وإعرف إن النار ما ترحمك يالجسم النياري

حبيب العازمي

والله إني ما اترك الوعل المذير لين أصيده = زال باقي طلقة (ن) وحده تثورها السواري
أنت وش دخلك يا سلطان في ديرة رفيده = وأنت يم الخاصره تطرد وراء نزل القماري

سلطان الجلاوي

الوعل يا صاحبي ..................... البعيده = ما تصيبه بندقك لو كنت رجال إنتحاري
.......ياحبيب عقب ما شبت وقيده = ماني مجنب وأبا انزل سوق بايعها وشاري

حبيب العازمي

ماعلي بعيد لو كان ألحقه يم الحديده = العتيبي ما يرده لا نهار ولا غداري
روح حاول يا عساك تموت لك ميته شهيده = ما يطير ألا الصقور ولا ذل ألأ الحباري

سلطان الجلاوي

والله إني خابرك وقت اللقاء رجل (ن) فقيده = مار تالي أيامنا يالعازمي ماني بداري
ميتتي تفجع عتيبه وأنت تعرفني فقيده = الجلاوي لو يموت تشيلكم لفح الذواري

حبيب العازمي

تعرف إن الرجل يا سلطان دايم من عضيده = نص همي من غليص ونص همي من مكاري

ابن المحايا

13-Nov-2010, 12:49 AM

ماعـلي بعـيـد لــو كــان ألحـقـه يـم الـحديـده***العـتـيـبـي ما يـرده لا نــهـار ولا غــداري

الله الله

صح لسان ابوفيصل وصح لسان ابو صاهد

الجلاوي مستواه في تطور من تالي

اتمنى له التوفيق

ولاهنت يابوفايح على هالموضوع الرائع كعادتك

سيف السليس

13-Nov-2010, 12:58 AM

صح لسان سلطان الجلاوي و حبيب العازمي
والجلاوي شاعر من بداياته :) وشهد له الكثير من الشعراء ..

كل الشكر لك ,,

تركي الصفياني

13-Nov-2010, 01:26 AM

إبداع من الطرفين

وحبيب ماينقص بل يزيد

شكرا ابو فايح

الهزبري

13-Nov-2010, 03:12 AM

حبيب

من دهاة الشعر..

والجلاوى

ابدع في هذه المحاوره وند قوي لحبيب

دائما تأتينا بالجديد والمفيد يابو فايح

الله يعطيك العافيه

محمد ابن رووق

13-Nov-2010, 09:58 AM

ابو فايح ابداع حيث كتب

مدري ليه احس المعنى ليس له علاقه بتركي بل قناة المرقاب او المركز الي فيه حبيب ريس

مزحم العتيبي

13-Nov-2010, 12:23 PM

والله إني ما اترك الوعل المذير لين أصيده
زال باقي طلقة (ن) وحده تثورها السواري

ههههه والله حبيب ناوي على نية شكلة مخطط على شي

صح لسان حبيب وصح لسان الجلاوي ، صراحة الجلاوي في هالمحاورة متطور ومبدع وخصم عنيد لحبيب

فيصل بن فهد الجهني

13-Nov-2010, 01:40 PM

بغض النظر عن المعنى ..

الجلاوي بدا يتطور .. و صراحه شي مفرح .. و اتمنى انه يستمر على تطوير مستواه اكثر من كذا و يلتفت للمعنى و يترك الجمهور عنه

ابو فايح .. لك كل الشكر .. انت مصدر التمير هنا .. هنيئا لنا بك

,,, تحيتي

وافي ضاوي

13-Nov-2010, 03:51 PM

ياحبي لثنين وصراحة ابدعو

وانا مع ابوفايح في المعنى

ولاهنت على نقلك المتميز

الجوراسي

13-Nov-2010, 03:58 PM

الجلاوي نجم في هالمحاورة وناقش حبيب في المعنى واستكمل النقاش في جميع محاور المعنى

واعتقد ان المعنى عن الساحه والمرقاب

ولكن مابعد كلامك كلام ياابو فايح

فهد علي العازمي

13-Nov-2010, 04:33 PM

انا اتوقع انها شبيهه لمحاورة حبيب وحمدان

عموما لاهنت يابو فااااايح

مشكووووور

سويلم الشيباني

13-Nov-2010, 11:13 PM

الجلاوي يقول لحبيب ( سامع قصة جديدة ) وحنا هالحين عام 1431 هـ وموال تركي قبل هالتاريخ باكثر من سنتين وهذا دليل قاطع ان المعنى مهوب عن موال تركي

المعنى على شي جديد طازه على قول المصاريه

وانا اشوف اعتذار حبيب عن موال تركي شي عادي ولايستاهل من اي شاعر يبني عليه معنى لكن استغرب من بعض الاعضاء كل محاورة مع حبيب يقول الشاعر يقصد موال تركي

ابو فايح

14-Nov-2010, 06:47 AM

ابن المحايا
مرحبا يابن المحايا ولاهنت على مرورك الرائع

سيف السليس
حياك الله ولاهنت على مرورك

فهد العازمي
ماشاء الله عليك خطير كلام سليم ولذا كتبت أنا الملاحظه في بدايته الموضوع أن بعض الأبيات قريبه لمعنى أخر وهو ماسبق أن تناوله حمدان وحبيب ولكن من منتصف الأبيات إلى أخر المحاوره الأبيات أرى أنها لا تخرج عن ماقلت من معنى .

ابن سويلم
حياك الله وجهة نظر نحترمها وعلى العين والرأس ولكن هناك أمور جديده تخفى على بعض الجمهور سيتم ايضاحها في وقتها .

صابر عليهم
حياك ولا شكر على الواجب

الهزبري
مرحبا مرور رائع وتواجد ينير المتصفح

محمد ابن رووق
مرحبا الف يا محمد ما طرحته وجهة نظري ربما تكون خاطئه منك نستفيد
لماذا بنيت توقعك على ما قلت ؟؟؟

مزحم العتيبي
مرحبا يا مزحم لاهنت على تشريفك

فيصل بن فهد
مرحبا يا فيصل فعلا الجلاوي يتطور بشكل ملحوظ وبدأ يسير فالطريق الصحيح ونتمنى له التوفيق
بيض الله وجهك على تعطيرك للمتصفح

وافي ضاوي
لاهنت على مرورك

الجوراسي
حضور مميز كالعاده والمجال مفتوح وكلامي ليس قرأن منزل أتمنى أن توضح كيف المعنى عن الساحه والمرقاب .

خلف المطيري

14-Nov-2010, 08:52 AM

المعني

شاعر قناة الساحه وصف قناة الساحه

نص همي من غليص ونص همي من مكاري

ومخرج الطواري واضح مايحتاج تفسير ماهو تركي ولا مواله شي اخر

واللي يبيني اعلمه يدفع 200 ريال هههههههه

نياف العضياني

14-Nov-2010, 10:30 AM

جابها المطاري ابو مخين ههههههههههههههههههههه

ابو فايح

14-Nov-2010, 05:51 PM

خلف المطيري

14-Nov-2010, 08:47 PM

خلف المطيري

حياك الله

فهمت ما ترمي إليه ولكن أنا متأكد 200% أن المعنى ليس ذلك ولا فيه اي شي يحوي بذلك سواء الأحداث أو الأبيات

طيب ليش ما نقول

غليص وهو المطلوب والمقصود الأول تركي 2000
ومكاري رفيق الدرب ملفي المورقي

ملفي وتركي ماضايقوه ولا لهم علاقه في قناةالساحه

المقصود الشاعر ومستور القصير

نسيت لعبته هالزمان يوم يقول

ماباقي الا قول تكفون ياعتيبه --- مواله مع الجلاوي

-------------------------------------------------------------

يا حبيب طال عمرك سامع(ن) قصه جديـده
بين سكان الجبال وبين سكـان الصحـاري

بين سكان الجبال وبين سكان الصحاري اظن واضح هنا لايجي واحد يقول يقصد قحطان واضح المعني
جبال السروات

خابرك بين العرب ما عشت في عيشه زهيده
وش حدك يوم تبحث لك على مخرج طواري

هنا يقول وش خلاك ترضي فالامور هاذي وتعقد صفقه وتتنازل عن مبادئك

---------------------------------------------------------------------

كان فيها مشكله ناد المجلـه والجريـده
وأنت داري والعرب مافيه واحد معك داري

الشطر يقول حبيب كانفيها شي عندك الجرايد والمجله لاتذخر شي

والشطر الثاني تكذيب للجلاوي يوم قال ماغير ك احد داري يعني محدامصدقك

من يجيه الشر قسمه والمعافى الله يزيده
ماعلي من المجنن لو تصـدم فالكبـاري

هنا يقول حبيب من سعا فالشر يصبر علي الشر
والشطر الثاني يقصد ماعلي من المهبل لا ضيعت طريقها

أنت لو شاورتني بجيـك بالأريـاء السديـده
قدم تسري ............. في جنـح الغـداري
العرب فـي دربهـا والله يدبـر مـا يريـده
والبلا من ضحكة الحربي ومن ضحك المطار

هنا الجلاوي يطالب حبيب ويقول ليه ماشاورتني

والان اكلها من الاجناب ياحبيب ورمز لهم فالحربي والمطاري ولو القافيه علي اني كان قال قحطاني
مجرد ترميز

وراح الطاروق شد بينهم

وهذا الطاروق قريب له فالمعني

http://www.youtube.com/watch?v=Qz3ZQW_2ULE&feature=player_embedded

والله اعلم

تركي الصفياني

14-Nov-2010, 10:10 PM

النقد ينقاده ماهو توقع
هههههههههههههههههه

وين اللي ينقد فالايام هاذي
ونقده في محله

لكن مره يقول كذا ومره يقول كذا

لا انا ولانتم بمستوى نقد شعراء

اتمنى ان تقبلوها برحب

خلف المطيري

14-Nov-2010, 11:29 PM

النقد ينقاده ماهو توقع
هههههههههههههههههه

وين اللي ينقد فالايام هاذي
ونقده في محله

لكن مره يقول كذا ومره يقول كذا

لا انا ولانتم بمستوى نقد شعراء

اتمنى ان تقبلوها برحب

ههههههههههههههههه

تكلم عن نفسك لو سمحت مالك شغل فينا:p:p:p

محاوره مصلعه

مافيها غموض واضحه

وبعدين اللي حلل للجبرتي ماهوعجزان عن هاذي ههههههه

فهد الزهراني

14-Nov-2010, 11:33 PM

النقد ينقاده ماهو توقع
هههههههههههههههههه

وين اللي ينقد فالايام هاذي
ونقده في محله

لكن مره يقول كذا ومره يقول كذا

لا انا ولانتم بمستوى نقد شعراء

اتمنى ان تقبلوها برحب

اخي الغالي

ولا يهون الجميع

ليس هنا نقد ولا هذا مجاله

النقد عندما تتعرض لبناء القصيدة او البيت ومدى اجادة الشاعر لها وله بناء وحبكة وجزاله وما الى ذلك

هنا وفي مثل هذه المواضيع الامر يتعلق بمحاولة معرفة المعنى وهو احيانا يستعصى على الشاعر المقابل فمابالك بجمهور لا يعرفون الا النذر اليسير من الاحداث بين الشعراء وهي الامور الرئيسية للمعاني.

نحن نجتهد في معرفة المعنى دامه في حدود الامور المعروفه بين الجماهير والمتداوله ولا يعني عدم معرفة المعنى انا اخفقنا بالعكس ربما المعنى يكون لموضوع خاص جدا حدث بين الشاعرين فكيف تريدنا ان نصل له ولكن من خلال المتابعة تحاول ان تربط بين المواضيع الساخنه على الساحة لأن الشعراء دائما يتطرقون لها ويتعرضون لها في محاوراتهم..

عموما الشاعر بشر عادي ولا نعطيهم اكبر من حجمهم ويحمدون ربهم ان هناك من يتابعهم ويحلل كلامهم يعني نحن نمن عليهم بهذا وليس العكس.

وصدقني لو يتنازلون ويعلمونا بمعاني 5 محاورات من محاوراتهم لشفت العجائب من طريقة اسقاطاتهم للمعنى ولعرفت انا مغرورين في كثير منهم .

واكبر مثال شاعر المعنى وهو نبذة مصغره عما يصير في شعر المحاورة وشارك بها شعراء معروفين من قبل البرنامج وعليك ان تعود كيف ناقشوا المعاني التي اعطيت لهم من اللجنه؟؟

هذا رد بسيط على مداخلتك ولي عودة للموضوع

لاهنت وكل سنه وانت وكل الاحبه هنا بألف خير

تركي الصفياني

14-Nov-2010, 11:42 PM

يعطيك العافيه يالزهراني
ماشاء الله عليك مسرعك كتبت ذا كله هههههههههههههههههه
الله يزيد من خيره

لكن انا اشوف
ان الشاعر يظلم من قبل ناس تموه على المعنى وتظلم اناس وفيها عنصريه فهذا لا يغرك

لكن كلن محاسب على غلطه

بالتوفيق
وانت بالف خير

تركي الصفياني

14-Nov-2010, 11:46 PM

ههههههههههههههههه

تكلم عن نفسك لو سمحت مالك شغل فينا:p:p:p

محاوره مصلعه

مافيها غموض واضحه

وبعدين اللي حلل للجبرتي ماهوعجزان عن هاذي ههههههه

؟؟؟؟؟؟؟؟؟؟؟؟؟؟؟؟؟؟؟؟؟؟
ماقلنا شي
طيب الصح معك ولا مع ابو فايح تراكم موهتونا
ولا دفاع عن تركي :D:D:mad::)

ابو فايح

14-Nov-2010, 11:59 PM

اسير الروح

15-Nov-2010, 03:24 AM

اتمنى من كل من يريد تحليل المحاوره او اي محاوره يكون المعنى فيها عن سفر الدغيلبي

( حتى يكون تحليله صحيح )

ان لا يربط بين سفر وقناه الساحه لأنه بعيد عنها كل البعد ولا يعمل بها كما يعتقد البعض,

ومن يربط بين سفر وقناه الساحه في التحليل سيكون تحليله خاطئ 100%

ومثل ماقال ابو فايح البعض يكذب الكذبه ويصدقها ويحاول بهذه الكذبه التفرقه بين شعراء عتيبه الكبار .

خلف المطيري

16-Nov-2010, 04:12 AM

صابر عليهم
وجهة نظر نحترمها

خلف المطيري
حياك مره أخرى
أولا الله يرحم مستور القصير ويسكنه فسيح جناته
ثانيا البعض يكذب الكذبه ويصدقها ولا أقصدك أنت ربما سمعت الكذبه وصدقتها
الخلاف اللي حصل بسيط بين القصير وحبيب العازمي وانتهت الامور خلال شهر وارجع لموضوع كتبته أنا في قسم الأخبار عن السالفه ونهايتها وملفا السوطه على حبيب العازمي

المهم إن السالفه لها أكثر من سنه .وتفاصيلها على هذا الرابط
http://www.otaibah.net/m/archive/index.php/t-94316.html

وثالثا وش دخل سفر الدغيلبي وهم لعبوا سوا خلال هذا العام أكثر من أربع حفلات!!!؟ ؟؟.

ورابعا لماذا لا تسقط المعنى على المحاوره بيت بيت وخاصه الرموز القويه

من هو الوعل المذير ؟؟؟
ولماذا حبيب يقول لين أصيده ؟؟؟

ابوفايح انا ما اقصد مستور القصير ولو ادري انه متوفي ماذكرته انا عطيتك رمزين وماهو مهم الاسم

المهم المضمون

غليص ومكاري

راح ارسل لك علي الخاص واقولك منهم

ولو يلعب وياه عشر ماهو اربع وش المشكله عادي اوجيه متوالفه واهداف متخالفه

وفالنهايه هذا اجتهاد حسب المعطيات ممكن خط وممكن صح

تركي الصفياني

19-Nov-2010, 08:03 PM

ياخلف ويابو فايح
انت منزل الموضوع وقلت معناه
حصل خلاف خله يثبت قدام الاعضاء فالموضوع ذا دليله
وانت رد عليه

اما طريقتكم ذي
خلاص بنزل موضوع واذا خافلني احد بقول ارسل لك
وينقطع الموضوع

ابو فايح

19-Nov-2010, 11:30 PM

خلف المطيري مثل ما قال تركي

أنا بالنسبه لي أتكلم بكل شفافيه

وطرحت عدة نقاط ولكن لم ترد عليها وطرحت موضوع القصير وحبيب ولم ترد عليه

لا أحب النقاش عبر الرسائل الخاصه إن كان لديك شي معقول إطرحه بكل أحترام وسنحترمه حتى لو إختلفنا معه.

تركي الصفياني

20-Nov-2010, 12:16 PM

ايه كذا تلويه لوي ههههههههههههه
خله يثبت
داري انك يالذيابي اصيل

تركي الصفياني

21-Nov-2010, 12:27 AM

يلا ياخلف هات البرهان

السامي الجعيد

22-Nov-2010, 02:36 AM

والله إني ما اترك الوعل المذير لين أصيده
زال باقي طلقة (ن) وحده تثورها السواري

كفو يابو فيصل والدرب قدام

لاهنت يابو فايح

سلطان الاشراف

22-Nov-2010, 05:37 AM

أبو فايح ومليون ونعم..وبدون قصور فالباقين وكلهم على العين والرأس..ولكن هذا الكلام الزين إذا فيه شيء يكون عالعام وبكل صراحه ووضوح وشفافيه..........
وعشان يستفيد الأعضاء كلهم وأنا أولهم..مو كل ماقربنا نوصل لخاتمه..خليتوا الحلقة الأخيرة على الخاص ههههه..
والله حتى المسلسلات أرحم منكم هههههههه على الأقل يعرضون الحلقة الأخيرة حتى لو مافيها أحداث.......

المنتدى للفائدة والفائدة للجميع..وإلا ليش الناس تتعب وتحط منتديات..وليش الأعضاء يتعبون ويشاركون..إذا مافي فائدة...........

أو خلوا كل إثنين عندهم موضوع يقعدون يراسلون بعضهم على الخاص..ويروحون كل إثنين سوا ..........

نرجوكم كاش عالفراش ياجماعة الخير.............

تحيااتي .. سلطان الأشراف

خلف المطيري

22-Nov-2010, 05:58 AM

طيب طيب

المقصودين رشيد الزلامي وسفر

وتابع المحاوره عدل تشوف راكبه

والوعل هو اللي عاش وبنا نفسه واصبح قيادي وصاحب قرار وحبيب يتهدده وهذا غلط

رغم اعجابي في حبيب العازمي الا انه اراد شي غريب

يبي كل شي من قناته انت عتيبي عندك قناتي ولا ازعل عليك مايصير هاذي تعتبر انانيه

المقصود رشيد وسفر

واسرف في سفر

هذا ماعندي بغيتك علي الخاص ورفضت يالله عاد الحين فكني من كلام ههههههه الربع

محمد ابن رووق

22-Nov-2010, 06:01 AM

خلف المطيري

22-Nov-2010, 06:07 AM

كلامك جميل ومافيه شي

لكن مابين سفر وحبيب اي خلاف ولا منافسه كلا وله طريق

انا ماقول يامحمد

الطاروق حسب ماشوف يقول كذا

المتابع لمحاورات الشعراء حبيب سفر رشيد يقول فيه شي

والخلاف ماهو شرط امضارب صدقت هذا في طريق وهذا في طريق

لكن الخواطر لاحقها شي

وفيه طاروق بين حبيب وسلطان نفس الموضوع

ويمكن تحليلي غلط

سلطان الاشراف

22-Nov-2010, 06:14 AM

خلف بيض الله وجهك..لأنك قلت ماعندك بكل صراحه..وكذا نستفيد من شيء إسمه منتدى بمعنى الكلمة...........

ومافي شيء الواحد يستحي من ذكره..لو كان بها زعل مايتطرقون لها الشعار في كلامهم على الملأ..والصراحه والتوقعات دايم ما تزعل أحد ............

كلامي كله لتعم الفايدة للجميع..ونشكرك ياخلف..وإلى الأماااام

تركي الصفياني

22-Nov-2010, 01:48 PM

ههههههههههههههههههه
تطورت منفوووووحه
اشوى طلعت الزبده
بعد ويش ياعميش

ابو فايح

22-Nov-2010, 06:55 PM

خلف كيف اكتشفت الخلاف ؟؟؟

سفر يلعب في قناة المرقاب وأخرها فالعيد
ورشيد الزلامي أخرها البارح فالطائف

وأيضا تقابلوا أكثر من مره

ونشاهد ما يحدث بينهم فالميدان ضحك وسوالف أما القلوب أنت وأنا لا نعلم عنها

بعدين كيف يلحق الوعل المذير ؟؟؟
ماهو متقابل معه أخرها حفلة ابن سمار سواء سفر أو الزلامي

وبالنسبه لرشيد

حبيب حضر حفلة ابنه في شهر 8 وحضرت قناة المرقاب
وقلبها لعبوا فالرس

كيف ما أحد درى بالخلاف ألا أنت ؟؟؟

خلف المطيري

22-Nov-2010, 07:21 PM

ابوفايح دليل القلب حركاته

لا اعلم عنك يابوفايح هل تتهزا فينا ام تناقش

عموما

لو بقابله مليون مره ماهو دليل

الشاعر ممكن يتعشا عندك ويلعب علي راسك عادي

وحسب مافهمت من كلامك ان الخلاف لازم يكون شاهر ظاهر

لكن شف الطاروق هذا

http://www.youtube.com/watch?v=XCGgVfHVNfg&feature=related

http://www.youtube.com/watch?v=Z8rt0mobR94&feature=related

ابو فايح

22-Nov-2010, 07:43 PM

خلف المطيري

وش الحركات اللي شفتها وتنبأت أنها دليل خلاف ؟؟؟

نعرف خلافات الشعراء عندما
لا يتقابلون لسنوات أو يتكلمون على بعضهم في المحاورات مع خصومهم أو يصرحون تصريحات ضد بعضهم

هل هناك غيرها ؟؟؟

بالنسبه لمحاورة الجلاوي

أقسم بالله العظيم أنها على معرفتي ليست في سفر الدغيلبي بتاتا وأعذرني من البوح بمعناها .

ماني بهايب

22-Nov-2010, 07:43 PM

خلف رغم انك شاعر الا اني انقد عليك في بعض تحليلاتك وتصرفاتك
الخياليه والبعيده كل البعد عن المنطق والعقل .
رغم سنك المتقدم وخبرتك الكبيره في الحياه .

ماجد العصيمي

23-Nov-2010, 12:07 AM

ابو فايح لاهنت على الموضوع

اعتقد المعنى بعيد عن تركي ومواله

خلف المطيري

شتت الموضوووووووووووووووووووووع

احمد منير الواصل

23-Nov-2010, 01:44 AM

الله لايهينك اخوي ابو فايح
ويعطيك العافيه ومحاوره جميله بين شبح الهيلا وسهم الهيلا
وابوافيصل ناوي على نيه بس انت اصبر شويه

والجلاوي والله مبع في محاوراته وخاصه المحاوره ذي وله مستقبل قوي
لبو صاهد
ونحن ننتظر التحليل من اهل الشعر بس بدليل القاطع موتخبيز

خلف المطيري

23-Nov-2010, 06:49 AM

خلف رغم انك شاعر الا اني انقد عليك في بعض تحليلاتك وتصرفاتك
الخياليه والبعيده كل البعد عن المنطق والعقل .
رغم سنك المتقدم وخبرتك الكبيره في الحياه .

ماني بهايب

لا يتوسع الكلام

عمري ماتعرفه وخبرتي لاتعلم عنها شي وتصرفاتي ماضرت احد كلها من باب المزح المباح وتحليلاتي

لاتنقص شي ولاتزيد شي كلام من عرض الكلام

واخر مره نشارك في تحليل

تووووووووووووووووووووبه