قالو تطيب وقلت أنا كيف باطيب

[عبدالعزيز بن حمود العريدي]

بسم الله الرحمن الرحيم
موجهه إلى الشاعر/ حمود بن محمد العريدي
قالو تطيب .... وقلت أنا كيف باطيب وجرحي عطيب ومال جرحي مداوي
يلوعني مالاع شالح على ذيب واقنب قنيب الذيب بالرجم عاوي
وأنا اللذي لي لابةٍ تكسب الطيب اهل المروه والشيم والنخاوي
عتيبه الهيلا شيوخ الأجانيب كرمان الأيدي بالزمان السناوي
ربيع قلبي مدللين الأصاحيب رجالهم يسوى ثمانين ساوي
حماية الساقة رجال المواجيب أهل القنى وأهل السيوف الرهاوي
سباع الظلام مطوعين المصاعيب نعم بهم لاعودة للعزاوي
لاجاء نهارٍ فيه للموت تسبيب خيالهم قلبه من الخوف خاوي
لاجاء من الحاكم علوم ومناديب عاداتنا رد البرا ما نراوي
ترفع بيارقنا بروس المراقيب في ماقفن صعبٍ كثير البلاوي
ماهي علوم مروجين الأكاذيب كبار الجروم مخيبين الهقاوي
ياحمود ياريف الركيب المتاعيب شريدة اللي مابقيله شلاوي
ياللي تحل المعضله والمناشيب يابن الرجال مطوعين العصاوي
لك فزعتن تبري القلوب المصاويب لاعشر الشيطان والضد غاوي
تضرب على الكايد كما الزير وكليب شرب الخطر لك مثل شرب القهاوي
بشكي عليك الحال ياسالم العيب ياالطاهر اللي مامشى بالدناوي
حيثك فهيم وماضين لك تجاريب ولك عند رب العرش حظ وعراوي
ياحمود باح السد وين التطابيب وين العلاج اللي على الجرح قاوي
عفت المنام وعفت صافي المشاريب كني قريص الداب بارضن خلاوي
وآ... قلبي اللي صوب العام تصويب تصويب حرابٍ على الضد هاوي
بسباب غرون صوره عالم الغيب عرق على كبدي ثمانين كاوي
سنه صغير و ضارين للتعاجيب مصيون عرض ولامشى بالملاوي
وجدي على لاماه صاف العذاريب بدر التمام اللي من العقل راوي
وطول هجري كان هو طول الغيب عزالله أني مهجلن يا النداوي
وختامها لك عندنا فايح الطيب والنفس من دونك حجاب وغطاوي



[ عبدالعزيز بن حمود العريدي]