اعجبتني ونقلتها لكم

[مبارك مسفر الرقاص الحافي]

اشهر ما قيل في القهوه العربيه

--------------------------------------------------------------------------------

القهوة هذا المشروب الذي اصبح رمزا من رموز العرب وجزأ لا يتجزأ من حياتهم اليومية ...

تطرق له الشعراء الكبار بين وصف وتقدير وصرفه لمن يستحقه وتوجد عليه ..


ابدا معكم بأشهر ما قيل في القهوة

هذه الأبيات للشاعر دغيم الظلماوي الشمري

حيث قال ::

يا كليب شب النار يا كليب شبه
عليك شبه والحطب لـك يجابـي
حنا علينا جيـب ماهـا وحبـه
وعليك تقليط الـدلال العذابـي
ادغث لها يا كليب من سمر جبـه
وشبه ليامنه غفـى كـل هابـي
واحرص على جمره من احراق حبه
ياما العرق تشوف على الحب ذابي
ودق البهـار وبهـره ثـم صبـه
تصبغ على الفنجال مثل الخضابـي
ونجرٍ توال الليـل يدعيـك نبـه
لا طق طاره حس ذيـبٍ بنابـي
الوالمه يا كليـب عجّـل بصبـه
والرزق عند اللي يجيب السحابـي
ومن يوجعه راسه ترى الهيل طبـه
وليا تقهوا كيفـة الـراس طابـي
بـاغ ليـا شبيتهـا ثـم قـبـه
تجذب لنـا ربـع سـراة غيابـي
سـراة ليـل وناطحيـن مهبـه
لا نسنست يا كن به سـم دابـي
بنسريةٍ يا كليب صلـفٍ مهبـه
متلطميـن وسوقهـم بالعقـابـي
إن شابط المنزوع خطـو الجلبـه
ياما حلا يا كليب خبط الركابـي
آقف لهم وأبـدي سـلام المحبـه
لا جنّب الهيّن عريـض العلابـي
بكلامٍ أحلى من شخاليـل جبـه
وأحلى من السمن الجديد العرابـي
مع كبش مصلاح لـك الله نجبـه
ومن مدفق السكين حن الركابـي
خطو الولد فوقه زبـونٍ وجبـه
ويجي عليهم من حساب الزهابـي
وأصبر وإن الصبر يا زيـن غبـه
يرقيك روس مشمرخات الهضابـي
ومن لا صبر يا كليب في حكم ربه
هذاك يوم الحشـر مالـه ثوابـي


وهذه القصيدة الرائعة ذات الصيت الواسع للشيخ تركي بن حميد العتيبي :


يا ما حلا يا عبيد في وقت الاسفار
جر الفراش وشب ضـو المنـاره
مع دلة تجذا على واهـج النـار
ونجر اليا حـرك تزايـد عبـاره
النجر دق وجاوبـه كـل مـرار
ما لفه الملفوف مـن دون جـاره
في ربعة ماهيب تحجب عن الجـار
لامن ولد اللاش ما شـب نـاره
وأخير منها ركعتيـن بالأسحـار
لا طاب نوم اللي حياته خسـاره
تلقاه في يـومٍ يضيعـن الأفكـار
يومٍ على المخلوق ما أطول نهـاره
وقم في قصير البيت حشمة ومقدار
لو جار فإدمح له ولو به خسـاره
ترى النبي وصى على الجار لو جار
خذ الحذر يا عبيد عقب النـذاره
رافق قوي الدين حفّاظ الأسـرار
ينفعك في يومٍ يجـي بـه كـراره
ترى الهوى والغي هن شر الأشرار
ومن داس عار الناس داسوا لعاره
جنب ردي الكار ما فيـه تعبـار
ما فيه من فعـل المناعيـر شـاره
واسلم ودم بالخير يا طير غيمـار
وصلوا على المختار ما غار غـاره


وهذه قصيدة الشيخ مشعان بن هذال في قصته المعروفة مع الدويش :


قم سو فنجال ٍ ترى البال منـداش
يا شوق من قرنه على المتن مرجـود
في دلـة ٍ مربوبـة ٍ كنهـا شـاش
وبهارها مقدار خمسة عشـر عـود
والهيل حطه لا تداني ولـو جـاش
ومن الزباد اقنع على شذرة العـود
أبيه رسم ٍ للنشامـا عـن الـلاش
اللاش لا فاقـد ولا هـو بمفقـود
تر لذة الدنيـا معاميـل وفـراش
وصينية ٍ يركض بها العبد مسعـود
والطيب سنة والردى كنه الطـاش
واللي يريد الجود ما هوب مـردود
في ربعة ٍ يقعد بهـا كـل هتـاش
يفرح بها اللي من دنايـاه مضهـود
وصفرا تلوح بالضحى كل مهبـاش
يصطي على قلب المناعيـر بالعـود
ربيع قلبي يوم زوعـات الادبـاش
صفر ومغاتير ٍ ويبـرا لهـن سـود
مرباعها الصمان تبعد عن الطـاش
ومقيضها دخنة ليا صـرّم العـود
أبي ليا جانا مـن المـال شوبـاش
وتطاوحت من بين الاسلاف جلحود
من لا يروي شذرة السيف لا عاش
عسى عليه مورّد الجيـب مقـدود

والشيخ هايس بن مجلاد رحمه الله له هذه الرائعة :

قم سو ما يصبغ على الصيـن لذيـاب
بـدلال يشـدن البطـاط المحاديـب
احمس ليا مـن العـرق فوقهـا ذاب
واستدن ما يجذب عليك الشراريـب
نجر يصيح من الطرب تقـل بحجـاب
يصبر على طول الدهـر للمواجيـب
وليا انطلق من مزلقه كنـه خضـاب
ورس صبغ بكفوف بيـض الرعابيـب
صبه لمـن قـاد السرايـا للأجنـاب
اللي بمحاسه يشبع النسـر والذيـب
والثاني اللي وان لفوا له على ركـاب
قدام بيتـه تقـل مجـزر قصاصيـب
والثالث اللي وان غشى الزمل ضبضاب
يرخص بعمره دون زمـل الرعابيـب
وباقي الملا يكفيهم التول لـو شـاب
رصاصـة المجلـس حميـر المشاعيـب
اللي نهار الكـون يفـزع بمصـلاب
كبار الأنفـس ساهجيـن المواجيـب


وهذه القصيدة للشيخ وارد بن نهار العواجي في وصف القهوة وبعض المعاني :

الكيف قبل اليـوم حنـا شربنـاه
جدٍ على جـدٍ شربنـا الحشايـش
ياما شعمنـا النـار للـي تنصـاه
يغدي عماس اللي على الكيف دايش
إنجورنا بالليل تسري علـى غنـاه
صهيـل شقـرٍ ركـزٍ العرايـش
فنجالنا يشدا خضـاب الخونـداه
ما قيل نـي ولالـه الجمـر نايـش
ردينا اللي تدفـق السمـن يمنـاه
لا صار تالي الزاد غـادي نوايـش
ابيوتنـا بالخـوف دايـم مبـنـاه
نرذ المعـادي يـوم دور الغبايـش
الـى تبيـن درب كـود ضربنـاه
الى انهضم راع الضلوع الهشايـش
كم هجمةٍ نجعـل عليهـا منـاداه
صملانها عقـب التملـي نشايـش
خيالنـا يبـرز نـهـار المـلاقـاه
يروي حدود مصقـلاتٍ عطايـش
نصبر على زلـت رفيـق دمحنـاه
صبر الجمال اللي تشيـل البلايـش
الى من راعي البوق أظهـر مخفـاه
على الرمك نقعد صغا كل طايـش

وهذا الشيخ سعد بن قطنان السبيعي يعتبر من رموز الكرم والسخاء في قبيلة سبيع وأحد مشاهير كرماء العرب وهو القائل في القهوة :

جر الفراش النا وهات الدلالي
أربع مغاتير على النـار تدنـا
ترى حلاة النار دوم إشتعالـي
وسوقة فناجيل عليهم من أدنا
فنجال أشقر مثل دم الغزالـي
ليا نقص شيء من الكيف زدنا
أتعب لها بالسوم لو كان غالي
لو كان زود بالثمن ما نشدنـا
نشري لها المثلوث هو شف بالي
لو كان سوقه نازح عن بلدنـا
ياما دفعنا بالثمن مـن ريالـي
غير القرا نسهر لهم ما رقدنـا

وله أيضا في القهوة:

قم يا رويشد شب ضو المناره
ثم هات من صوته يقود المسايير
نجرٍ ليا حـرك تزايـد عبـاره
يا زين صوته بين عوج الدواوير
يا مسوي الفنجال كثر بهـاره
جلفٍ ويتلنـه ثمـانٍ مغاتيـر
حاذور يالصباب تثني مـداره
ألا على اللي ينطحون المخاسير
أحد ليا سيّر عرفنـا وقـاره
واحد ليا سيّر يدور التفاكيـر
كم واحدٍ ناشي بليا خسـاره
مصبرٍ نفسه على البخل تصبير
هو يحسب إنّا ما نعرف الصقاره
يعد عمره من حساب المناعيـر
يا حبنا والله لجمـع التجـاره
لولا الحياء حنا نعرف المعاذيـر


ومن قصائد القهوة هذه الأبيات من ضمن قصيدة طويلة مشهورة
للشاعر المعروف محمد العبدالله القاضي
وهي في وصف القهوة وطريقة اعدادها :

دنيت لي من غالـي البـن مـا لاق
بالكف ناقيها عن العـذف منسـوق
إحمس ثلاث ٍ يا نديمي علـى سـاق
ريحه على جمر الغضى يفضح السـوق
واياك والنيـة وبالـك والاحـراق
واصحا تصير بحمسة البـن مطفـوق
ليا اصفرّ لونه ثم بشـت بالاعـراق
صفرا كما الياقوت يطرب لها المـوق
وعطّت بريح ٍ فاخر ٍ فاضـح ٍ فـاق
ريحه كما العنبر بالانفـاس منشـوق
دقه بنجر ٍ يسمعـه كـل مشتـاق
راعي الهوى يطرب الى دق بخفـوق
لقّـم بدلّـة مولـع ٍ كنهـا سـاق
منصوبـة ٍ مربوبـة ٍ تقـل غرنـوق
خله يفوح وراعي الكيـف يشتـاق
ليا طفح له جوهر ٍ صـح لـه ذوق
أصفر قموره كالزمـرد بالاشعـاق
وكبارها الطافح مـا صافـي المـوق
زلّه على وضحا بهـا خمسـة رنـاق
هيل ٍ ومسمار ٍ بالاسباب مسحـوق
مع زعفران ٍ والشمطري ليا انسـاق
والعنبر الغالي على الطـاق مطبـوق
فيلا اجتمـع هـذا وهـذا بتيفـاق
صبّه كفيت العوق عن كل مخلـوق
بفنجال صين ٍ زاهي ٍ عند الارمـاق
يغضي بكرسيّه كما اغضاي غرنـوق
إليا انطلق من ثعبتـه تقـل شبـراق
رنق ٍ تصوّر للحمامة علـى الطـوق
شكّل على الفنجال لونـه إلـى راق
دم الغزال ليا انمـزع منـه معلـوق
خمر ٍ إلى منـه تسلسـل بالاريـاق
وعليه من ما صافي الـورد مذلـوق
راعيه كنه شـارب ٍ ريـق تريـاق
كاس الطرب وسرور من ذاق له ذوق

وهذه قصيدة للشيخ عجران بن شرفي السبيعي الذي اشتهر بأنه لا يثني الدلة ولا يذبح الماعز لضيوفه ::

يا فهيد صك النجر يوحيك بتال
صكه كفاك الله جميـع الأذايـا
استدن نجر في الدهر يعول اعوال
اعوال سبـع حاديتـه الضرايـا
وعليه كيف لي من البن فنجـال
جعل الرخوم ونسلها لك فدايـا
وعده لحماي النوايب والأثقـال
في الضيق لامـن إلتقـن المنايـا
واللي يحزب زاد بيته ليا اكتـال
وحط المعاني الطيبة لـه شرايـا
واللي ليا رد البرا بين الأعمـال
لا رفعـوا لقطيهـن بالهـوايـا
واللي يروي حربته بالتجيـوال
له عادةٍ يرخص سمـان العطايـا
وباقي العرب خله ولو كان زعال
هذا وبالمجلـس كثيـر الحكايـا


والشاعر محسن بن علي بن جغيثم السبيعي قال أيضاً في القهوة::


يا عيد شب النار قم سو قم سو
قم سو فنجالٍ وزيـن قنـاده
هات الدلال ووسع بحفرة الضو
شب بحطب سمرٍ ولوعه عـراده
خل النشاما لا تلافو لك وجو
يلقون من جدك مراسيم عـاده
إحمس من البن الخضر لا تلافوا
وللعود حط شداد وألا وساده
وبهارها هيلٍ من الباخـرة تـو
توه منزّل من سنابيـك سـاده
مع البحر ملفاه وألا مع الجـو
.مع زعفرانه كبر رجل الجراده
حتى يجي فنجالهـا لا تقهـووا
مثل صفار البيض في كأس ساده
فإن كان هم عجلين قل تغدوا
وألا العشاء مضمون مثل العباده
حتى لا راحوا لأهلهم وقفـوا
كلٍ يعد الطيب على إنفـراده

وأيضاً الشاعر عبدالهادي بن راجس السبيعي قال في القهوة::


أوي فنجال يصبـه مسويـه
وحنا سوالفنا على جال ضوه
في ربعة والبيت يرفـع بقاريـه
بيت على ماقيل يرفـع بقـوه
تالي نهاره وأولـه دايـج فيـه
قم سو فنجال المطاليق سـوه
احذف لها رمث كبار مثانيـه
تـو الجماعـة نازليـن بجـوه
والماء تخيّر من زلاله وصافيـه
من مزنة ماخاشر العج جـوه
واحمس ولاتحرق وحاذر تنييـه
ما بين فرغهـا ومابيـن تـوه
وإجغف لها من طيب الهيل غاليه
والزعفران بكثرة الهيل شـوه
صبه على اللي طيبات معانيـه
واختص من هو بالمراجل تفوه
اللي يعّنز لك ليا رحت ناصيه
يسلم ولا يسلم ردي المـروه
والشاعر سلطان بن مبارك الأدغم السبيعي يقول أيضاً في القهوة ::



سليم شب الضو مالك مهانه
يجي لها ضوحٍ يقـود السراتـي
وأشغل بفنجال وزيّـن زيانـه
وإحذر من الإحراق وألا النياتي
ريح وطعم راعيه ينشع لسانـه
أطرف حمر لونه كما دم شاتـي
عده على اللي لا هرج لك تكانه
قليل هـرج وبالملاقـا زناتـي
يفداك من هو عايش بالذهانـه
وإيديه لحبال الـردى قاضباتـي
طاريٍ عليه الجود تالـي زمانـه
زل الشباب وهو على ذا السواتي
عند الجماعة مهلقٍ فـي لسانـه
وهو لا يحذف ولا يجيب الحصاتي



================================
مبارك مسفر الحافي