تفضل ياسعد العصيمي

[فهد الشهيب الثبيتي]

مساك الله بالخير يابن عاصم انت ومن يتابعنا

تفضل كان وقتك يسمح


سلامي سلام ٍ فيه معنى وتضمين=ومعناه يختص الرجال الفهيمه
اشوف العرب في تالي الوقت مقفين=ولن شفت واحد قلت وش هالغنيمه!

[فايز بن سرحان الثبيتي]

طيب طيب


صح لسانك يافهد وفي انتظار اكمتال الابداع من ابو مطر وصح لسانه سلفا "

[فهد الشهيب الثبيتي]

هلا مرحبا يابن سرحان

شرفتنا بمرورك طال عمرك

صح بدنك

[سـعـد الـعـصـيـمـي]

مساك الله بالنور ياهلا ومرحبا


هلا مرحبا والبرق ينشاف بالعين=ولو ان غيمه غيمت فوق غيمه
تكلم على كيفك واحاسبك بعدين=يجي يوم واذكرك في هـ الكليمه !

[سـعـد الـعـصـيـمـي]

صح بدنك يابو ريان
نورت المتصفح ..

[فهد الشهيب الثبيتي]

طيب طيب


يبا يبرق البراق ويسيل سيلين=ولكن توقع يعقب السيل ديمه
لقينا بني مره ثلاثه وشيخين=وسادسهم اللي جوّد شداد ريمه

[سـعـد الـعـصـيـمـي]

من الزين ماخفنا وخفنا من الشين=ترا عاقبة بعض التهور وخيمه
بعد ضيقتك هذي ترا الناس دارين=ليا جتك رضوه خل نفسك كريمه !!!

[فهد الشهيب الثبيتي]

ليا من دخلك الخوف حنا شجيعين=لكن الله اعطانا قلوب ٍ رحيمه
لك الله مااسوي سواة المساكين=ولاجيت ادور دام فالراس شيمه

[سـعـد الـعـصـيـمـي]

انا من عرفتك وانت من حين لاحين=تشق الصفوف ولاتسوي جريمه
طلع لجنةٍ لمخالفات الدكاكين=اذن الثبيتي يشتريله غنيمه

[مازن الشيباني]

كلام كبير من شعراء كبار

صحت الالسنه والقلوب

[سـعـد الـعـصـيـمـي]

أرحب يامازن والكبير الله ..
صح بـــدنـــك

[فهد الشهيب الثبيتي]

طيب طيب


تقوله وانا اللي محتمي ماقفي زين=وفعلي مثبت فالعصور القديمه
ترا ماجهلنا في نظام القوانين=عقب هذي اظنك تحصل قسيمة

[فهد الشهيب الثبيتي]

مرحبا يامازن الشيباني

اسعدتنا بمرورك وصح بدنك

[سـعـد الـعـصـيـمـي]

مشينا قدم وانتوا على الخلف ماشين=كلامٍ يزَعل هن يرضي خصيمه
تناوشت قش الناس والناس ممسين=عسى صرتك تنفض وترجع سليمه

[فهد الشهيب الثبيتي]

تقوله وحنا من رجال ٍ مسمين=وبعض العرب من ضعف حالف غريمه
عطاكم طويل العمر خنجر وسيفين=عقب مابراد الجو ذعذع نسيمه

[سـعـد الـعـصـيـمـي]

لو ان الزمان يعود شفت الامرين=على الامن خلك والك حشمة وقيمه
غلا البشت قدم يحل برد الطويلين=وكلن غدا يدخل على ايات خيمه !!

[سـعـد الـعـصـيـمـي]

تصبح على خير يا فهد
وان بغيت نكمل بكره كملنا باذن الله
وان حصلت الكفاية صح لسانك ولنا لقاءات اخرى ؟

[فهد الشهيب الثبيتي]

لو يعود بعض الناس تسرح مع الضين=على الهون مادام الك قدر وحشيمه
ترا البشت مايذريك في يوم الاثنين=ليا جاك شيخ ٍ قام يكرب بريمه

[فهد الشهيب الثبيتي]

والساري يلقا خير ياسعد

هذي البيتين نزلتها قدام اشوف ردك التالي كان ودك تغطيها غطها

الوكاد صح لسانك وماقصرت ولنا لقاء

[حمود بن خيشوم العصيمي]

صح لسااانك فهد الشهيب

صح لساانك سعد

تحياتي

[سعيدان العتيبي]

صحت السنتكم ياشعراء ولاهنتوا

[متعب المقاطي العتيبي]

صحت الالسن والقلوب

[فهد الشهيب الثبيتي]

حمود بن خيشوم , سعيدان العتيبي , متعب المقاطي

حياكم الله وصحت ابدانكم

شرفتونا بمروركم الكريم

[عيد العازمي]

فهد وسعد


ابداعكم محل الاهتمام


وتشرفنا بالاطلاع


صحت السنتكم وافين

[فهد الشهيب الثبيتي]

ارحب ارحب ياعيد

والابداع كله في حضورك طال عمرك

الشرف لنا بدوون شك

صح بدنك وشاكر لك مرورك الكريم