فالنتاين الحريري

[أبو فيصل]

لعلّ عيد الحبّ ماهوب معيود=ما أعرفـه ولا يعترف به عشيري



جانا من الرومان بشروط وقيود=وقمنا ندرهم به بظهــر البعيري



عوايد الكفـّار ما تجلب الفود=اللي بها منكر ينادي .. نكيري



والله ما أشبّ شموع وأوزّع ورود=تقنع حبيبي كلمـة ٍ من ضميري



دوبك على مغليك يا باشة الخود=الحال متقلب ووضعــه خطيري



يا اللي تهزّ الغصن لا تكسر العود=ماعاد نلقى جابرين الكسيري



خلـّه عسى يهتزّ لا هبّت النود=وتوّقـع أوراقه وطيره يطيري



هذا خبر عاجل بالأرصاد مرصود=وهذاك فعل ٍ ما يسرّ النظيري



دايم عربنا بين حاسد ومحسود=والشرّ بين أقطارها مستطيري



وأهل الوجيه البيض راياتها سود=والوجه الأظلم ما يحبّ السفيري



شبنا نخون عهود ونوّقع عهود=ونرفع شعارات إرتباط المصيري



ونقول دام السيف محني ومجرود=أكيد لا جات اللوازم شطيري



يعيش كل الجيش ضبّاط وجنود=ويموت ما يطلق سراح الأسيري



نسنس هوى بيروت مع ريح بارود=الله عليه أكبر ونعم الكبيري



تفجير والتفجير بإثبات وشهود=جريمة ٍ نكرا وجرم ٍ كبيري



التصفيه بحسابها قادها قود=اللي يجاذبها بسلك الحريري



حسب إعتقادي وأغلب الظن معقود=والبحث جاري والفلك يستديري



بين الأسد بشّار .. وأميل لحوّد= تقاسموا مقتل رفيق الحريري !

منقول