هل نجا حبيب وملفي من قنبلة الزلامي؟؟؟؟؟

[المطيعي]

حبيب

سلام ومرحبا والوحده تكفي عن الثنتين *** لكن الوافيه من عادتي للناس اقدمها

علومك يالزلامي كن مالك صوت هاليومين *** عساها كلها فترة هدوء وانت متغانمها


الزلامي

هلا يامرحبا ترحيبة الغالين للغالين *** على شان الوفا منك استلمها لا تسلمها

تراني شايف ن فيكم مرض ياربعنا الاثنين *** مادام الناس تمرض من علومي ليش اعلمها


حبيب

تبا اكثر مسلمين الهند ولا مسلمين الصين *** مادام ان اللغات السبع من حقك تترجمها

تراك انته سبب عندك خطا واضح بلا قوسين *** تحزم لك عرب في ذمتي محد ن يحزمها:D


الزلامي

انا ماشفت ملفي وين انا مدري حبيب وين *** ليا غابت وجيه المورقه غابت عوازمها:D

ترانا عارفين الدين ياللي تدعون الدين *** شياطين ن نبا نجمع حصا بقعاء ونرجمها


حبيب

تبانا مع مجانين العرب حنا ترا صاحين *** لكن انته مكلف فالمجانين وتليمها

شهدتوا بانها حايل رباع وولدت بتيسين *** وباين سنها من حين ماكشت براطمها:D


الزلامي

اعرف المورقي مبطي واعرف العازمي هالحين *** والا ياويلهم من قنبله توي مولمها:eek:

شهدنا هالسنه وانتم شهدتم فالربيع الزين *** اجل وش رايكم نجمع شهادتنا ونقسمها


حبيب

وحنا عارفينك يالزلامي قبل عشر سنين *** تثور القنبله وتقوم فالغدراء تخمخمها:D

من اول نحسبنك تشري الحبحب بلا سكين *** واثرك اللي مايشريها قبل يعرف مداسمها

[ܓܨ عبدالله البرقاويܓܨ]

شكرا لك طرح راائع
وهذي فيديو
http://www.youtube.com/watch?v=DAT08hNGYMw

[فهد الزهراني]

قاف رائع

والاثنين مجرمين بحق وحقيقة

بس سؤال الشهادة (لا تكون شهادة رشيد للشيخي)

[فهد علي العازمي]

صح السنتهم شعار كبااار

وموضوع الشهادة صادق أبو فيصل في رشيد كل يوم مقدم شهادة مجانية وبالأخص في شاعر المعنى والغالبية لم ينجح أحد أما الشيخي شاعر يشهد له الجميع وليس رشيد فقط

مع كل الشكر للجميع

[خالد بن مورق]

من أروع المحاورات

[سفيرالهيلا]

محاوره رايعه وكلهم كبار وحبيب يقص البيت من البيت وهاذا ميزته

[الجوراسي]

هذه المحاورة من اقوى محاورات حبيب ورشيد والمحاورة بعد شاعر المعنى وطبعا حبيب وملفي يلومون رشيد بسبب مشاركته في شاعر المعنى

من جماليات المحاورة

رشيد
تراني شايف ن فيكم مرض ياربعنا الاثنين *** مادام الناس تمرض من علومي ليش اعلمها


حبيب
شهدتوا بانها حايل رباع وولدت بتيسين *** وباين سنها من حين ماكشت براطمها


وايضا حبيب
من اول نحسبنك تشري الحبحب بلا سكين *** واثرك اللي مايشريها قبل يعرف مداسمها


وهذا البيت خلا رشيد يغير ويطلب حبيب مره اخرى رغم وجود ملفي

[الجوراسي]

حبيب
شهدتوا بانها حايل رباع وولدت بتيسين *** وباين سنها من حين ماكشت براطمها

وانا اعتقد ان حبيب كان يقصد الفكرة ( فكرة البرنامج ) يعني انكم تقولون ان ماحد سبقكم عليها ولكن من اول حلقه ظهر للناس انها فكرة مستهلكه وقديمه وغير ناجحه

[السراح الروقي]

من اجمل وارقى المحاورات شكراً اخي المطيعي شكراً اخي عبدالله البرقاوي ...

[ابراهيم الجـــــذع]

الزلامي

انا ماشفت ملفي وين انا مدري حبيب وين *** ليا غابت وجيه المورقه غابت عوازمها


حبيب

تبانا مع مجانين العرب حنا ترا صاحين *** لكن انته مكلف فالمجانين وتليمها



هذا القوه اللي يتميز فيها رشيد

واللي يحسبها البعض كلام عادي او مجرد اسامي

بينما هي معاني قويه ورد احبيب رد قوي

على حجت رشيد و وجهت نظره الصحيحه

[ابراهيم الجـــــذع]

الزلامي

انا ماشفت ملفي وين انا مدري حبيب وين *** ليا غابت وجيه المورقه غابت عوازمها


حبيب

تبانا مع مجانين العرب حنا ترا صاحين *** لكن انته مكلف فالمجانين وتليمها



هذا القوه اللي يتميز فيها رشيد

واللي يحسبها البعض كلام عادي او مجرد اسامي

بينما هي معاني قويه ورد احبيب رد قوي

على حجت رشيد و وجهت نظره الصحيحه



لتوضيح اكثر

رشيد في هذا البيت لم يذكر ملفي المورقي

وملفي في الشطر الأول يقصد شخص لافي

وفي الشطر الثاني ليا غابت وجيه المورقه

يعني الوجيه الشابه مثل الشيخي

غاب العازمي وغيره من الشعراء

حبيت اوضح هذه النقطه رغم أني ما أحب التوضيح

[المطيعي]

اولا اشكر كل من مر على موضوعي

ثانيا اعتذر على التاخير في الرد

عبدالله البرقاوي فائق شكري على المرور والمقطع


فهد الزهراني شكرا على المرور يالغالي


فهد علي العازمي شكرا على المرور يالغالي


خالد بن مورق شكرا على المرور يالغالي


سفير الهيلا المميزات واجد لاهنت على المرور


الجوارسي اولا اهنئك على التميز وتستاهل ياولد العم


ثانيا البيت الذي فسرته اروع بيت في المحاورة وخذ التفسير مني



شهدتوا بانها حايل رباع وولدت بتيسين *** وباين سنها من حين ما كشت براطمها


شهدتوا بانها: حبيب يقصد المسابقات الشعرية


حايل : ضخمه من حيث الميزانيات والترتيبات الهائله والاهتمام من كل الجوانب


رباع : معروف ان الرباع هي التي مضا من سنها اربع سنوات ومعروف ان بداية المسابقات برنامج شاعر المليون قبل اربع سنوات من وقت المحاورة


ولدت بتيسين : اي ان المسابقات الشعرية انقسمت قسمين وهو تصوير ساخر من ابوفيصل


التيس الاول : مسابقات شعر النظم


التيس الثاني : مسابقات شعر المحاورة

ماصار تحليل بيت صار سوق غنم خخخخخخخخخخخخخخخخخخخخخخخخخخخخخخخخخخخخ


نرجع للشطر الثاني


باين سنها : يعني عرفنا ان هدفها قديييييييييييييييم الربح المادي الفكره قديمه فكرة الربح المادي وليست فكرة المسابقه قبلها شات القنوات واشياء اخرى


من حين ماكشت براطمها : اي من حين بداية المسابقة


السراح الروقي شكرا على المرور يالغالي



ابراهيم الجذع ما اوافقك الراي لو رشيد قال وجيه ن مورقه او الوجيه المورقه كان صح قلتا يقصد الوجيه الشابه اما وجيه المورقه اخالفك الراي وعموما اختلاف وجهات النظر لا يفسد للود قضيه شكرا على المرور يالغالي





دمتم بود


تحياتي

[ابومشعل العازمي]

يعطيك العااااافية