ياجماعه كلن يبدي رايه

[علوش بن محيا]

ياجماعه عندي حفله يوم 6/10/1431 في محافظه ساجر ويش رايكم أعزم شعار مع أنا العلم أني مخصص مبلغ خمسين ألف ريال للشعار فقط وعشر ألاف ريال للصفوف وأنا صراحه أبيها حفله ماتنسي وش رايكم أي الشعار وأي الصفوف وأي المكاتب مع أني أفكر في تراث الشعراء وشرايكم تصوير الحفله الساحه ولا المرقاب ولا بدون تصوير رجاءا بسرعه عطوني أرائكم

[الـقـرم الـعـطـاوي]

هلا يامرحبابك يابن محيا

واقول الله يبارك في حفلكم والله يوفقكم ان شاء الله

اول شي وانا اخوك الشعار اللي يجذبون الجماهير(سلطان الجلاوي+تركي الميزاني)والافضل سلطان الجلاوي مدامها في ديره عتبان ومعه من الشعار سفر الدغيلبي+القرقاح+حمودي السمي او فواز العزيزي وان كان معهم حبيب افضل<<هذا علشان الحضور والحماس.وان بغيت شعار علة الوزن الثقيل مستور العصيمي +حبيب العازمي+الزلامي وااجد الشعرا وانا اخوك

والصفوف انصحك بصف عميد صفوف الهيلا نياف العطاوي

تقبل تحياتي

[مرقاب الشمال]

اذا تبيها حفلة عالميه وتبقى في الذاكرة

جيب صفوف الطائف السوطة

وتصوير المرقاب والساحة

والشعراء :

حبيب و مستور و السناني و تركي 2000

كان ودي اقولك

حبيب و مستور و السناني و الرياحي

علشان تصير مثل محاورة الطيارة الشهيره

الله يرحم الرياحي ويجعل مثواه الجنة

والله يبارك في حفلكم وان شاء الله تدوم افراحكم

[عبدالمجيد النفيعي]

دام عندك الإستطاعه على إقامة فعاليات للحفله وبتكلفه من غير خساره إن شالله

،،

أنا من رأيي إن من أهم هذه الفقرات هي المحاضرات الدينيه وتنتقي محاضرين لايملون لا الشباب ولا الشياب من سماعهم

،،

أما بخصوص الشعر من وجهة نظري إذا كان لك معرفه في أحد أبناء عمومتك أو ربعك في ساجر (عاد أنتم ماشالله عليكم من منابع الشعر :)) شاعر أو شاعرين تجد فيهم الجزاله وقادرين على مواكبة الاعلام أعطه دافع من خلال حفلتك في محاوره كانت أو نظم
إذا كانت نظم لاتِكثر من الشعراء الغير معروفين إعلامياً حتى لايمل المشاهد إختر واحد أو إثنين ويفضل يكون منهم صاحب صوت شجي أيضاً مع تواجد نجم أو نجمين متوهجين مثل بن عكم المعروف بندر بن محيا

الوسائل الإعلاميه قناه أو قناتين جيّده من ناحية التصوير والمشاهده وإذا كان عندك محاوره إبعد عن قناة الصحراء لأن مشكلتها تقطع في المحاوره بشكل كبير حسب مالاحظت مع العلم إنها من أفضل القنوات عندي

وأسئل الله أن يبارك لكم بحفلكم إن شالله

[منيرالروقي]

نصيحة واحد مايبي الا الدعوة الطيبة



ملفي وسفر والقرقاح وابن مشيط (هاذي تطلع حمااااااااسية ) وبدون تهريج وشوشرة وأغلاط على القباي والضيوف في حفل يحمل

اسم ابن محيا

وقناة الساحة لانها تخلي حفلك حي على مدار السنة ماهوب يطلع مرة ثم ينحذف في سلة المهملات

[الجوراسي]

انا بقول رأيي كأنها حفلتي:

المكتب : تراث الشعراء وهذا رقمه في الطائف 027270202

القنوات : عليك بقناة النخبة التي لاتعرض الا محاورات النخبة ماهي محاورات الهشك بشك.. ولا تنسى ان قناة المرقاب متميزة في اخراج الحفل بشكل ممتاز.

الشعراء :

حبيب العازمي ومستور العصيمي ورشيد الزلامي (( ترا لو رجعت للعشر سنوات الماضية لن تجدهم معا الا في حفلة واحدة. وان اضفت ملفي معهم جات حريقة ))

او

حبيب ومستور وفلاح القرقاح وسلطان الهاجري.

الصفوف: تراهم مفتاح نجاح الحفلة وياحبذا تعزم صفين لايقل عدد كل صف عن 20 . يعني تعزم صفين مختلفين كالسوطه ونياف العطاوي

[فهد الزهراني]

الزلامي
حبيب
السناني
القرقاح
...............

سفر
ملفي
الشيخي
تركي2000
..............
مستور
حبيب
بن مشيط
السناني

..........

الزلامي
العضيله
القرقاح
السناني


والله يوفقك ويتم افراحكم على خير

[فهد علي العازمي]

أنا أقول لو توفر الفلوس تراها ابرك لك
وتجيب لك شيخ ومسابقات وجوايز للحضور مثل حفل إبن فيهيد
وتخلي المحاورة والشعار اللي مايجون الا على 15000 ريال
ولا وراهم الا دوخة الراس
وعساااااه حفل مبارك وزواج سعادة وطاعة

[علوش بن محيا]

بيض الله وجيهكم جميعا أنا صراحه ودي أنه يصير حفل حماسي نار مشعلله وصراحه فكرت في حبيب ومستور ومحمد السناني ورشيد الزلامي وفلاح القرقاح ومحمد بن مشيط وعلي الدعيه وسعيد بن رحمه
وزيد العضيله وعبدالله الميزاني والصفوف أبي أحط صف نياف العطاوي وصف فهد المطيري يعني مايقل الصف عن 15 رجال والتصوير قناه الساحه والمكتب تراث الشعراء وأنا ماعندي مانع لو دفعت زياده مافيه مشكله لكن أنا أبيها حماسيه مره مره ولا تنسى

[المقاطي.]

انصحك بشعار الوزن الثقيل

[انا الهيلا]

اذا تبي متعه وشعر وحريقه يابن محيا
سفر وابن شايق وابن مشيط ورشيد
او
سفر وحبيب وابم مشيط وتركي
او
سفر والجلاوي وبن شايق والقرقاح.......< هذي اتمناها بديار عتيبه وعند شيخ من عتيبه

طع شوري يابن محيا والله ماتندم ولاتزيد عن اربع شعار

[عبدالله العصيــمي]

اذا تبي متعه وشعر وحريقه يابن محيا
سفر وابن شايق وابن مشيط ورشيد
او
سفر وحبيب وابم مشيط وتركي
او
سفر والجلاوي وبن شايق والقرقاح.......< هذي اتمناها بديار عتيبه وعند شيخ من عتيبه

طع شوري يابن محيا والله ماتندم ولاتزيد عن اربع شعار

هلا يا أخوي

وأرجو أن تتقبل رأيي بصدر رحب

من ناحية الجلاوي ، وابن شايق ،، فأنا لا أتفق معك

إبن شايق أرى أنه مهرّج ، أما الجلاوي بصراحة لا تعليق


يا ابن محيا


إن كان تبغا لك حفل يسمع به القاصي والداني

إحرص على (( حبيب العازمي )) أولاً ،، لأنه ممتع بطواريقه وألحانه وجزالته بالاضافة لحب الجماهير له


ويصيرون شعارك (( حبيب العازمي ، مستور العصيمي ، سلطان الهاجري ، محمد السناني ، تركي 2000 )


يعني أنا أضفت تركي 2000 نظراً لجماهيريته وليس لشعره

أما الأربعة الباقين فهم شعراء الوزن الثقيل في الوقت الحالي

[مشاري الحبردي]

حبيب ومستور


ماغيرهم غير




بدون قصور في الباقين

[وافي ضاوي]

حبيب العازمي , ملفي المورقي , فلاح القرقاح , سلطان الهاجري


وانحش عن المهرجين والله الفين ريال خساره فيهم

لاتسمع كلام الي يقول عشان له جماهير



المرقــــــــــــــاب




للتوضيح


تركي الميزاني مايجي الحفلة الي فيها حبيب العازمي ولا سفر الدغيلبي ولا سلطان الجلاوي

[عبدالله العصيــمي]

^^

هههه ولا تزعل يا وافي

،، أما بالنسبة للصفوف يا صاحب الموضوع

والله أنا ما أعرف إلا صفوف السوطه .... وأعتقد إنهم الأفضل ... ولا أعرف غيرهم

صفوف نجد هذي ما نعرفها :)

[الجوراسي]

نصيحه لله

قناة المرقاب

اترك الساحه

الا اذا ماتبي حبيب يجي وحنا بعد ههه

والشعار لايتجاوزون 5 ترا اليا كثروا خرب الحفل

[الصميدع المقاطي]

سفر الدغيلبي .. حبيب العازمي .. فلاح القرقاح .. ابن مشيط .. تركي 2000


وصفوف العطاوي


قناة المرقاب او الصحراء

تحياتي لك وبالتوفيق وحفل مبارك .

[ابو شرف]

بسم الله الرحمن الرحيم

السلام عليكم ورحمة الله وبركاته

سلام خاص ويوصل لكل واحد في محله من اخوكم المتغيب فتره طويله عن المنتدى محمد عبدالله شرف الثبيتي

ما احب اطول عليكم

لكن رايي في الموضوع اذا تبغاها حفله محد ينساها

جيب اربعه شعار حبيب العازمي ومستور العصيمي وابراهيم الشيخي ومحمد السناني او بدل السناني مصلح بن عياد

لان جيت للشعر فيه شعر وان جيت للفكاهه بتلاقي دام ابو فيصل موجود

وجهة نظر فقط لاغير

والله يتمم لكم بخير

تحياتي

[ابو شرف]

بالنسبه للمكت انا ارى تراث الشعراء

والقناه الساحه

[لماح]

انصحك بـ


حبيب العازمي عبد الله الميزاني محمد السناني تركي الميزاني


حبيب وعبد الله معروفة محاوراتهم نااااااارية ..


وحبيب والسناني أيضا محاوراتهم قوووية ومميزة ..


محمد السناني وعبد الله الميزاني محاوراتهم فريدة و قوة في المعنى


تركي الميزاني لجماهيريته ..




هذا الرباعي من الشعار لم يجتمع ابدا .. و انا واثق انهم اذا اجتمعوا ستكون حفلة لا تنسى !





ارجو لك التوفيق والنجاح لحفلك ..

[عبدربه المالكي]

حبيب العازمي وسفر الدغيلبي وتركي الفين ومحمد السناني


او



حبيب العازمي وسفر الدغيلبي وعبدالله الميزاني وتركي الفين









هذي المحاورات والا بلاااش





والف مبروك مقدماً والله يرزقك الذرية الصالحة

[الباااسل]

كلاً له وجهة نظر لكن انا ارى ان افضل قناه في تغطية المناسبه هي قناة المرقاب



والشعراء المتميزين ماهم كثير



واقوى رباعي وافضل رباعي إذا اجتمع في حفله بتكون من اروع الحفلات من وجهة نظري



حبيب العازمي وسفر الدغيلبي ومحمد السناني وفلاح القرقاح



وافضل مكاتب الشعر :



القصيّر ـ تراث الشعراء ـ الركن الوطني




نصيحه : ابعد عن شعراء المهاترات والكلام الفاضي اللي بعض الأخوه ذكروهم وقالوا انهم جماهيريين وينجحون الحفله

[المورقي 11]

حبيب والمورقي وعبداللة الميزاني والسناني وعليك بصفوف السوطه وقناة المرقاب والمنصه الكبيره
وعساه زواج مبارك وان شاء الله من ضمن الحضور

[هيلاوي شقاوي]

تبيها حفله عالميه مالك الا :

سلطان الجلاوي وفلاح القرقاح عبدالله السناني سلطان الهاجري

هذا اذا كنت تبي تسليط إعلامي وموالات ومحاورات ناريه وجديده

اما شعراء الوزن الثقيل (( الشيبان )) اللي ذكروهم الاخوان ماراح يقدمون لك شي جديد ومحاوراتهم شبه ممله

[ابن المحايا]

اهم شيء لاتجيب العضيلة


لانه افشل شاعر ويموت الملعبة

[فالح الشهراني]

لاتنسى ابن ثايب يالذيــب

[عبدالله العصيــمي]

تبيها حفله عالميه مالك الا :

سلطان الجلاوي وفلاح القرقاح عبدالله السناني سلطان الهاجري

هذا اذا كنت تبي تسليط إعلامي وموالات ومحاورات ناريه وجديده

اما شعراء الوزن الثقيل (( الشيبان )) اللي ذكروهم الاخوان ماراح يقدمون لك شي جديد ومحاوراتهم شبه ممله


سبحااااان الله

أجل شعار الوزن الثقيل يموتون الملعبة

والتسليط الاعلامي يجي على الجلاوي

أجل ما عاد نبا الشعر

[سيف شامان]

الله يوفقك يا علوش

بس لا زم تحجز الشعار من بدري عشان تقدر تختار اللي تبي منهم على راحتك

[صعيب المنال]

القنوات : الساحه والمرقاب

الصفوف : السوطه

الشعراء : أغلب الشعراء أبشرك ما يلعبوا مع بعض والمتابعين عارفين ,, اللهم لا حسد ,,

لكن فيه شعراء على مستوى بن مشيط , ابراهيم الشيخي , القرقاح , محمد السناني
ربما هؤلاء الأنسب وتشوف شعر صح مو مهاترات

والله يوفقك

[فهد الزهراني]

مالك الا ترضينا كلنا وماتعزم ولا واحد هههههههههههه

لأنك اذا ارضيتنا كلنا لازم تجيبهم كلهم وتدفع 500 الف بدل 50 الف

[ابو نايــف]

احمد ربك على هالنعمه 50 الف ماهي منطوله في الشارع

اصرفها على نفسك وعلى عيالك وهم اولى من هالشعار اللي بعضهم مايستاهل فنجال قهوه


اذكر كلامي زين وماراح تحس بها الا بعد مايسرون من الحفل

[أحمد المويعزي]

والله تبي نصيحتي لاتجيب شعار تكفي المحاورات اللي يسوونها غيرك

سولك شي ينفعك بقبرك

[ابو عطا]

نصيحتي لك 60 الف ريال تحطها في مخباك ابرك من الشعار واسفافهم على بعض .

لو توفرها وتتبرع بها لاجل ربي يبارك في زواجك ويرزقك الذريه الصالحه .

وجهة نظري .

[الحسيب]

اذا عزمت حبيب العازمي ثق ان المحاورة ستكون من فئه الخمس نجوم

سواء جاء معه شاعر معروف او غير معروف ..


والف مبروووووووووووووووووك مقدما

[لسان الحقيقة]

اخي الكريم وفقك الله
وجعل الله يتمم لك على خير

ياخي انا قبل البارح حضرة حفلة الرس وكان شعارها مستور العصيمي رشيد الزلامي وحبيب العازمي
وعبدالعزيز العازمي واثنين من شعار اسبيع

وكانت محاوره لاباس بها ومن بعد هذه الحفلة ودي اعطيك رائي بكل صدق وصراحه

ان يكون جميع الشعراء من العتبان لايساعد على نجاح الحفله

رشيد الزلامي شاعر بيته قوي ولكن بل طعم وصوته يجيب النوم والهم والكأبه واتمنى منه ان يعلن الاعتزال

مستور العصيمي اقضل حضور من الزلامي وعندما يزعل يجيب بيوت ذهب وقويه جدا ولكن على قول المثل الكبر شين .

لذلك والله العظيم اني ارا ان الشيبان مايصلحون ومنتهي صلاحياتهم

_______________________________________________ يبقى حبيب العازمي حبيب الجماهير والشاعر القادر على انجاح اي حفل يحييه ويبقى له اسلوب خاص
ومتميز عن جميع الشعراء ومطلب الجماهير عامه ومن كل القبايل وميزة حبيب ان يستطيع قيادة الحفله الى بر الامان لذلك احرص كل الحرص ان يكون حبيب العازمي هو اول شعراء حفلتك .


ومع حبيب من شعراء عتابه ملفي المورقي او وصل العطياني وبالامانه وصل شاعر خطير وقادم بكل قوه

ومن شعراء القبائل ارى انك تعزم القرقاح ومحمد السناني

ونصيحه لك لايتجاوز عدد شعراء حفلتك اربع شعراء اثنان من عتابه واثنان من اي القبائل

والقناه اما المرقاب او الساحه

الصفوف صفوف نياف العطاوي ارى انها جيده .

[الكاايد]

الله يوفقك ويتمم على خير

وإذا تبي شوري


مستور وحبيب و حمدان العصيمي وعبدالعزيز العازمي


وشوف كيف اللعب يصير :)


طبعاً مادام الحفله في نجد احسن لك صفوف العطاوي يمدحونها الربع واخوك من الحجاز مايعرفها

طبعاً السوطه مافيهم كلام ولكن ..... !


طبعاً قناة المرقاب عرضها جداً رائع .. وشرطان الفديو ع الذمه :)



اتمنى لك التوفيق

[علوش بن محيا]

أبشركم عزمت كل من الشعار
سعد بن جدلان و حبيب العازمي ورشيد الزلامي ومستور العصيمي محمد بن طمحي وفلاح القرقاح ومحمد السناني تصوير تراث الشعراء وقناه المرقاب ولحد الأن الصفوف ماتفقت معاهم أشكر كل من بدا بنصحه