من يعرف قصيدة ضويحي الحافي؟

[ابن مشيب]

السلام عليكم ورحمة الله وبركاته



هناك قصيدة للشاعر ضويحي الحافي في فنجال الشيباني , بمناسبة حصوله على المركز الاول في الوضح في مزاين ام رقبه , وقصيدة كانت رد على قصيدة سلطان الهاجري , فمن يعرفها ياليت ينشرها , لانني بحثت عنها ولم اجدها.


تحياتي

[مرزوق حمدان العتيبي]

...
لاهنت يابن مشيب
القصيده رائعه وجزله بكل ماتعنيه الكلمه
وانا قرأتها في جريدة الرياض ان لم تخني الذاكره
وسوف ابحث عنها لعلي ان اجدها واطلب عزّك يا ابن العم..
تحياتي..

[ابن مشيب]

ومن قال يالسنافي , والشاعر ضويحي ملتزم جزاه الله خير , وواجهته اكثر من مره في مناسبات , وكان يطري الحضور بقصائده الجزله والهادفة , وشاعر بكل ماتعنيه الكلمة , وقصيدته هذه , بحثت عنها ولم اجدها , وهي بالفعل قصيدة جزله.

والله لايهينك يامرزوق , واتمنى ان تجدها

[((الدلبحي))]

ابشر بسعدك
نبي ندور عليها وعسانا نلقاها


تحياااااااااااااتي

[مرزوق حمدان العتيبي]

الغالي بن مشيب
استلم كما وعدتك .. والسموحه على التأخير


قريت لي فالرياض ابيات شعريه = روايع ٍ فكر بن وسام محكمها
ابيات شاعرٍ من النقاد محميه = واهل العزايم ما قلل من عزايمها
من شان تقديم هذيه على ذيّه = كيف المصور يدبلجها ويبهمها
ونتايج الفوز مسموعه ومقريه = مدري فهمها غلط ولا تغاشمها
سلطان يوم الحقيقه شمسها حيه = ماظن مثلك يابن وسام يكتمها
قول الحقايق على العراف حتميه = والاوله كيف تجهل من تسلمها
من غير فنجال بالوضحى المثاليه = ثلاث مرات لازمته ولا زمها
جوايز الفوز مجموعه وفرديه = من لجنة ٍ عادله ماتهفي اذممها
سلطانه اللي خذتها بالميه ميه = بالاوله كل خلق الله تقيّمها
وضحاً عليها الهلال وهي هلاليه = اسطورة ٍ يعجز الرسام يرسمها
فيها من اللي يقود الريم عفريه = عظيمة الشان والخالق معظمها
في مقدم الوضح تشبه نصب وسميه =اقول تسلم ويسلم كف واسمها
مثل العلم فالعروق اللي لها فيه = من ذود فنجال ماتخفى معالمها
وانهبّت الريح شرقيه وغربيه = من دونها عزوة ٍ تعرف قدايمها
بين الشيابين مع ذود الخليفيه = محشومة ٍ في ذرى شيخ ٍ محشمها
فنجال واربوعنا اللي تحتم الهيه = وقت المزاعم تضد اللي يزاعمها
واليوم الاحكام معروفه وشرعيه = في ظل حامي بيوت الله وخادمها
جوايز الفوز مقبوله ومرضيه = با اسم المؤسس حضر مشعل يقسمها
حط الجوايز محليه ودوليه = ويحرص على الابل اخو نوره ويكرمها
وقصدي بما قلت فالروحه وفالجيّه = نتايج الفوز كل الناس تفهمها
وسبيع عندي لهم حشمه وجاهيه = وحقوقهم وافيه مانيب هاضمها
افعالهم بالكرم والجود مسميه = وحنا ارجال ٍ تشيمنا نتشيمها
والجايزه فالميادين العموميه =ماتبعد الناس وتفرق تلاحمها
وارجو عسى تغلب الحسنه على السيه = وختامها مسك الاعمال بخواتمها

[ابن مشيب]

اخي العزيز/ (( الدلبحي ))

تسلم والله يابوحمود وافي الله يطول عمرك , اشكرك على ردك الطيب.

تحياتي

[ابن مشيب]

اخي العزيز/ مرزوق العتيبي

بيض الله وجهك , وعدتنا ووفيت بوعدك ياصدوق الوعد , الله يعطيك العافيه , والله لايهينك على جهدك وكتابة القصيدة.

وصح السان الشاعر ضويحي بن حسن الحافي , قصيده جزله ووافيه من شاعر جزل , وذو حنكة في فتل البيت.



تحياتي