رفيع المنزل !!

[عبد العزيز العبدلي]

السلام عليكم

شاعرنا رفيع المنزل

لوتسمح بطاروق لافادة اخوك الصغير طال عمرك؟؟

اضف ردك وتجيك البدعه طال عمرك

..

[رفيع المنزل]

اتشرف والله

[عبد العزيز العبدلي]

الشرف لي طال عمرك

سلامي سلام البرق لا لاح في مزناه=على منزلن مرفوع ياطيب منزاله
يقولون بعض الناس عوّد على ماطاه=وعوّد ولاهو مشبعن معدة عياله!!

[رفيع المنزل]

ماعليش للتاخير ماشفت اسمك تحت وقلت طلع


هلا مرحبا ياعبد يشبه عبيد الله = وانا اقول يارجال للخيل خياله
ترى اللي يدور له على شي مايلقاه = هذا اشوى لخلق الله يرتاح واشوى له

[عبد العزيز العبدلي]

المعذره تو شفت ردك دقايق بس:)

[منتظم]

عزيز العبدلي صح لسانك

رفيع المنزل صح لسانك

ونا بصف ابني عمي رفيع المنزل ولا يهون أخي عزيز

متابع لكم ...

[عبد العزيز العبدلي]

أشوفك تزلّ اخطاك والعلم ماشفناه=علام الخضار ينوّع ألوان وأشكاله!!
من أول حبال البير توصل دلوّه ماه=وهالحين طول الحبل ماياصل الجاله!!

[عبد العزيز العبدلي]

منتظم ... صح بدنك واسعدتنا بمرورك

[نمرً المقآطي ] ’]

من أول حبال البير توصل دلوّه مـاه
وهالحين طول الحبل ماياصل الجاله!!



الله الله ياعزيّز .. صح لـسآنك ولـسآن رفيع الـمنزل ، ’

متـآبع ..

[عبد العزيز العبدلي]

نمر المقاطي ... صح بدنك ومتابعتك شرف لي يالغالي

[رفيع المنزل]

يمين الشحيح اليا عطت كنها يسراه = انا ويش اسوي في حلاياه وامثاله
تراني مجمل فيه واصبر على بلواه = وخله يسولف كل شي ٍ على باله

[رفيع المنزل]

ابم العم منتظم صح بدنك واتشرف بك



نمر المقاطي صح بدنك ومرورك يشرف

[عبد العزيز العبدلي]

وهذا يارفيع المنزل ايسار ماتشناه=كبني يميني عارفه كيف تصغاله!!
أمد اله حبلي مير حبلي على شلفاه=يسوق المنيه صوب هداج وحباله!!

[رفيع المنزل]

يقولون كان الوقت عاصيك لاتعصاه = لزوم نتحمل لعن ابو مثلها حاله
الا ياعزيز شوف غيري وروح انصاه = انا مااعرف مخراج هرجك ومدخاله


مع السلامة وصح لسانك ياعزيز

[عبد العزيز العبدلي]

الا ياعزيز شوف غيري وروح انصاه
انـا مااعـرف مـخـراج هـرجـك ومدخـالـه

صح لسانك ويعلم الله انك شرفتني لتلبية الدعوه طال عمرك