ناصر الجلاه اختر زميلك .. القاف مربوع بين اربع انفار

[سـعـد الـعـصـيـمـي]

مساء الخير
والله يحي الحاضر



نبغا لنا قاف مربوع ، مربوع بين اربع انفار=قم يالعصيمي على خير ،تغيير جو ولياقه

[طلال ناشي]

الله الله

مبروك ياسعد

[فايز بن سرحان الثبيتي]

اسمحولي اتلقف على المحراف "


الكرت ماهو بمطبوع .. والدعوه احبالها قصار = لكن نبا نعكس السير .. وانفوز باول بطاقه

[ناصر الجلاه]

..


مسيكم بالخير جميع

وحييت يابومطر :)




ميدان الابطال مزروع .. بالمعرفه سر وجهار = الوضع كله تياسير .. ربع وخوان ورفاقه !!

[سـعـد الـعـصـيـمـي]

اررررحب يابو ناشي والله يبارك فيك ويسلمك

خلك معنا

[سـعـد الـعـصـيـمـي]

اررررحب يابو ريان حنا ندورك دوره نبا الفايده

[الجوراسي]

ياسلالالالالالالالالام محاورة مولعه من بدايتها

[حاكم الغنامي]

الله الله


صحت الالسن والقلوووب


متابع للرباعيه


ومنتظرين الابدااااع

[سـعـد الـعـصـيـمـي]

الليل الليل الدور عند حاكم ولا طلال ولا الموجود

[فايز بن سرحان الثبيتي]

الليل يالجلاه دورلك خوي ولا سرانا "

[طلال ناشي]

منته من الخير مقطوع .. مادام فالدار شعار = يدهن لك السير وتسير .. وتشيل رخصة سواقه

[سـعـد الـعـصـيـمـي]

استلم يابو ريان

العكس ماهوب ممنوع ، لاصرت ضايع ومحتار=مثل الدلي عكس فالبير ، من دون قدره وطاقه

[فايز بن سرحان الثبيتي]

انا على يمينك يابو مطر ضد ناصر وطلال "


طلال لو يلحس الكوع .. ماخذ من اللوح مسمار = اثره مايلعب الزير .. ماغير قطاع ساقه

[سـعـد الـعـصـيـمـي]

هههههه انتو حستو الوضع وانا مادريت !! خويي منهو ؟

[طلال ناشي]

أنت اللي حست الوضع ياسعد

ههههههه

بس مو منك أنا عرف السبب <<< >>>

[فايز بن سرحان الثبيتي]

ولا حوسه ولاشي استمروووووا

[ناصر الجلاه]

..
استلم يابومطر :)







الوقت ساسه على الجوع .. والناس من تحت الاقدار = وابومطر رجل وبعير .. والمر يجرح مذاقه !!

[ناصر الجلاه]

..

واصلووووا


ابومطر طبه عندي وطلال يداوي فايز :)


الليل ياطلال


..

[طلال ناشي]

الناس طامع ومطموع .. مير أنت ياميت النار = أليا غزيت المناعير .. ماجيت منهم بناقه

[سـعـد الـعـصـيـمـي]

استلم يابو محمد


ماني بصياد جربوع , اصلا ماعرفه من الفار=وان صار وجه الزمن غير ، فرقا الزمان وفراقه

[فايز بن سرحان الثبيتي]

اثرك بلحيل مخدوع .. والليله علومك كبار = لكن رمتك المقادرير .. من تحت موس الحلاقه

[ناصر الجلاه]

..




يامكثر الشكل والنوع .. لكن ماني بمختار = هذا زمان الدحادير .. العولمه في سياقه !!

[طلال ناشي]

لاجيتني ساري أقطوع .. ماني بمسراك محتار = أعرفك من حنت القير .. للبعد مافيك طاقه

[سـعـد الـعـصـيـمـي]

ترا القلم عنك مرفوع ، حتى ولو صار ماصار=عندي على العلم تبرير ، المعرفه والعلاقه

[فايز بن سرحان الثبيتي]

امن الشهر تاخذ سبوع .. ماعاد نسمع لك اخبار = معذور مامنك تقصير ... انكان عندك رشاقه

[ناصر الجلاه]

..


أصل الحيا منك منزوع .. يالابس عقال وسوار = هاذي شهاده وتقدير .. معها هديه وباقه !!

[رعد الروقي]

الله الله



رباعي مميز



ندية وجزالة




سعد // ابن سرحان // ناصر // طلال



صحت قلوبكم

[ناصر الجلاه]

..

العمــده

..

صح بدنكـ .. حضوركـ جزل

لاهنت

..

[سـعـد الـعـصـيـمـي]

ارررررحب يالعمده

الجزاله تحضر بحضورك
صح بدنك

[فايز بن سرحان الثبيتي]

سعد ماهو دورك هههه لا تسقط ؟

[سـعـد الـعـصـيـمـي]

نسيت الله يذكركم بالشهاده

[طلال ناشي]

الهرج ماهو بممنوع .. والخيل تلعب على الطار = وليا لقيت المسافير .. مالي بشرواك فاقه

[سـعـد الـعـصـيـمـي]

تسقى من السم قرطوع ، تكوا من الميسم الحار=هذي دواء للتفاكير ، ان وردتك الحماقه

[فايز بن سرحان الثبيتي]

اخذ من السم قرطوع ... واخذ من الهم مشوار = وش وجهك من الجماهير ... بعد ارتكبت الحماقه

[ناصر الجلاه]

..



كلام ماهوب مسموع .. لو نوزنه ماله اضرار = يسري مع الليل ويطير .. وتسابقه في سباقه !!

[طلال ناشي]

يامرحبتين يالعمـــــــــده


صح بدنك ومرورك غالي

[فايز بن سرحان الثبيتي]

اما انا استاذنكم وانتظر الختام من طلال ناشي

وبيض الله وجيهكم جميعا ً .. والشكر لصاحب الفكره ابو مطر "

[ناصر الجلاه]

وأنا دربي درب ابوريان :)

وبيض الله وجيهكم جميعا ً .. والشكر لصاحب الفكره ابو مطر "

الله لايهينه وصح لسانه

[طلال ناشي]

أنته مع الناس دلوع .. أمدلعينك هل الكار = منك تجوز المعاذير .. والسوق نعرف غلاقه

[فايز بن سرحان الثبيتي]

أنته مع الناس دلوع .. أمدلعينك هل الكـار
منك تجوز المعاذير .. والسوق نعرف غلاقه




الله يرجك ههههه


مسك الختام "

[سـعـد الـعـصـيـمـي]

ماني على الهرج مدفوع ، الفعل قبله من امتار=من الغرق ماش تحذير ، البحر شين اصطفاقه



ابن سرحان ، ناصر الجلاه ، طلال ناشي

مشكورين جميعاً الله لايهينكم وصحت السنتكم

تصبحون على خير

[طلال ناشي]

صح ألسااااااانك يابن سرحاااان


صح ألساااااااانك ياســــعد والبشت يزهاكـ


صح ألسااااااانك يالجـــــــلاه


تحياتي

[قنوع النفس]

صح السنتكم ولاهنتم وعشت ياابومحمدولاهانو