سلامي على الهيلا عربين الأنساب

[الأسد44]

أتشرف باللعب مع أحد الأعضاء وإليكم الأبيات :


سلامي على الهيلا عريبين الأنساب = برده وفا بين الخصيم وخصيمه


أبا الشاعر الي يفتل بروس الأشناب = يقابل لنا مهماتكون الوسيمه

[حلال الصعيبات]

صح لسانك وننتظر الرد

[أبن الجزيرة]

الله الله

صح لسانك

وننتظر احد الشعراء

[عبدالله الفهد الاسعدي]

ارحب ارحب


هلا يالمسلم والقمر مابعد غاب = هلا مرحبا وإن جيت معك الغنيمه

حضرنا لعلك حاضر إن جاك طلاب = نريد السمينه مانريد الهليمه

[عبدالله الفهد الاسعدي]

عفواً

اذا كان فيه احد رد من قبل اعتذر

لم اشاهد الرد واعذروني

[الأسد44]

أستلم


ألايارفيق الخير حركت الأسباب = وتبشر بقيفان الوفى والحشيمه


وأنا أشوف ناس راحت أقسام وأحزاب = وترسل علينا كل يوم شتيمه

[الأسد44]

البيت عندك يا راع الزلفي


الي رد سحب مشاركته


وأنا أتشرف باللعب معك

[عبدالله الفهد الاسعدي]

عن الطيب واهل الطيب مانقفل الباب = حضرنا على عزه ونيه سليمه

لياشفت راع الحزب عده من اجناب = وحذاري تجاري من يحب الظليمه

[الأسد44]

وأنا يارفيقي من عنى الوقت منصاب = بلأخبار تطلع كل يوم جريمه


من ا لشرق فتنة ما لهاعد وحساب = وحزب تنطق بالعداوه زعيمه

[عبدالله الفهد الاسعدي]

طغاة الزمن تاقف على كل مرقاب = وتاجد لها من يحتوي بالخريمه

يقولون به مرشد وأنا اقول نصاب = ولايتبع النصاب غير البهيمه

[الأسد44]

وصح الله لسانك على كل كذاب = وأنا أقول يمكن يعقب السيل ديمه


ومادام ضلع طويق شامخ وينهاب = ندك الحصون الثابته والمقيمه

[عبدالله الفهد الاسعدي]

وصح البدن يوم الكذب صاحبه خاب = وريح الندى لابد يسبقه غيمه

ولا كل ضلع تطلع بروسه ذياب = وعسى الله يثبت كل راعي حشيمه

[الأسد44]

وتال الزمن كلن يطلع له كتاب = ويزعم بقوله والمزاعم وخيمه


ولكن شرع الدين ماعنه مجناب = ياليت البشر متجوده في صميمه

[عبدالله الفهد الاسعدي]

انا اقول مشكانا على رب الارباب = عسى الله يجنبنا دروب النميمه

احد يضحك بشده واحد قاعد(ن) منصاب = واحد خوصته مافكها من بريمه

تشرفت باللعب معك اخي الأسد 44

بيض الله وجهك وسامحني على القصور

شكراً لك من الاعماق

[الأسد44]

راع الزلفي شاعر ومبدع


وماقصرت وتقبل تحياتي ،،،،