علي العضياني و راشد السحيمي

[ابو فايح]

في ليلة رائعه حملت الكثير من الشعر الجميل في مدينة الطائف في ليلة جمعت سفر الدغيلبي ومحمد السناني وعلي العضياني وراشد السحيمي


اخترت لكم هذا الطاروق الرائع وسأنقل لكم بقية الحفل ان شاء الله لا حقا .




علي العضياني


مرحبا ترحيبةٍ ترديدها واجب و عاده = في محل عتيبه الهيلا كريمين السبالي
في بلدنا و السحيمي جابه الله من بلاده = في نجوم الليل ليله غير عن كل الليالي



راشد السحيمي


البقا و الماقف المشهور ما يبغى شهاده = اشهدوا له كلهم ماني بشاهد له لحالي
في بلدكم و السوالف خلها سكر زياده =نظرة يم البعيد و نظرة يم الموالي





علي العضياني


يالسحيمي ما يلام الرجل من بعد إجتهاده = و انت ياراع الجمل سوقه على درب الجمالي
فارس الفرّيس للحرب إمتطى صهوة جواده = لا تلفت للجنوب و لا تلفت للشمالي





راشد السحيمي


اشهدوا لك بالصلابه واشهدوا لك بالقياده = مار اخاف انك تصوت للعرب في صمد خالي
يا علي لا تعتكف في ديرتك ماهي عباده = ليش ما شاورتني يا مكسبي يا رأس مالي





علي العضياني


فرقبتك الكلمه اللي قلتها مثل القلاده= العتيبي من رجال (ن) يرفعون الرأس عالي
أنت ما شفناك لين إن الهواء ذعذع براده = ما أنت إبن غانم ذياب و لا أنت ابو زيد الهلالي





راشد السحيمي


لا تعود عين صاحبنا مثل عين الجراده = لا تغلاّ يالعتيبي وانت طول الوقت غالي
لا تذم الفارس اللي ما يحول عن شداده = ما يصير أتحطنا بالشمس وأنته بالظلالي





علي العضياني

نعرف المقرود طبعه ما يجوز من القراده = فالزمن دمه حلال أحل من دم الغزالي
المناصب تشغل أصحاب المعالي و السعاده = و أنت ما تحسب من أصحاب السعاده و المعالي





راشد السحيمي


ما يجوز أحط يدي بين رأسك والوساده = إن رجعنا للعلوم الأوله يا هملالي
أنته أصلك نار مار النار تاليها رماده = ما يجيك ألا الجواب اللي على قد السؤالي





علي العضياني

أنت أظنك يالسحيمي فيك طبع و فيك عاده = حرّ منزالك على روؤس الشواهيق الطوالي
العتيبي في اللزوم يشب ناره من زناده = وأنته تردد على طول المدى ( يا وجد حالي )




راشد السحيمي


لا تحول عادتك ليه ترى العقل الركاده = لا ترد هداج وأنته لا دلي ولا حبالي

[ابن المحايا]

أنت ما شفناك لين إن الهواء ذعـذع بـراده ***ما أنت إبن غانم زياد ولا أنت ابو زيد الهلالي

الله الله


لاهنت يابو فايح على النقل الاكثر من رائع


تحياتي لك

[علي بن عباد المطيري]

محاورة رائعة يابو فايح .





اما هاذي مالها طب :


أنت أظنك يالسحيمي فيك طبع وفيك عـاده = حر منزالك على روؤس الشواهيق الطوالي



العضياني يتطور مستواه بسرعة وسيضع له مكان جيد في الساحة .




رغم عدم معرفتي هل هو شاعر شاب أو كبير لأني لا أعرفه الا بأنه مشرف هنا , لكن مكانه بصراحة في ميادين المحاورة , لأن محاورات النت لها سلبيات كثيرة .

[حسن إبراهيم الدجيماء]

الله الله ,,

ابدااع من البنااخي الله يرفع شاانه ,,

وابدااع غير مستغرب من السحيمي ,,

مشكوور يابوفاايح ,, في انتظار البقية ,,

لاهنت ..!!

[حسن إبراهيم الدجيماء]

أنت أظنك يالسحيمي فيك طبع وفيك عـاده = حر منزالك على روؤس الشواهيق الطوالي

هذي ياعلي ,, فيها مقلب وخطير مشى على السحيمي ,, ولكن ابسأل علي إذا كان قاصدها أو لا ؟؟

وأبينها بعدين ..!!

//

إحترااامي ..!!!

[علي بن عباد المطيري]

يالدجيماء ليس شرط في كل مقلب أن يمر .

ومشكلة كلمة تمريرة انها اصبحت مرتبطة بكل معنى ( خزى ) كما يطلق عليه القدماء .





والسحيمي منتبه لها والدليل أنه رد بطلب العقل والركادة .



أنا تكلمت على قدرة العضياني على صوغ بيته بقوة وبطريقة خطيرة , ولم أتكلم على مرورها على السحيمي .

[ابو فايح]

لا هنتوا جميعا على مروركم




بالنسبه للبيت علي المذكور لا أعلم عن نيته علي فيه فالنوايا علمها عند الله ولكن البيت يحتمل أكثر من معنى


ولكن السحيمي رد برد رائع وغير مستغرب من شاعر كبير


وقال (لا ترجع عادتك لي ) وينصح علي بالركاده


عموما ايا كان قصد علي بيت السحيمي يغطيه بشكل جميل من جميع الأتجاهات

[علي بن عباد المطيري]

اظن المقصود كلمة فصيحة , والآن يستخدمها أهل الجنوب فقط .




وحتى لانتوقف كثيراً فالمحاورة لاتقاس بمثل هذه الامور .



لكن للأمانة كل بيوت المحاورة جميلة من الشاعرين ولم تشهد ضعف فيها , وبالفعل اختيار ناجح منك يابو فايح .

[حسن إبراهيم الدجيماء]

ولكن السحيمي رد برد رائع وغير مستغرب من شاعر كبير


وقال (لا ترجع عادتك لي ) وينصح علي بالركاده


عموما ايا كان قصد علي بيت السحيمي يغطيه بشكل جميل من جميع الأتجاهات


إسمح لي يابوفايح ,,

المقلب ليس معنى غامض حتى نقول ان الرد كان وافي ,, ورد السحيمي حسب مااراه لم يوفق ويدل

على ان المقلب مشى ,, هذا إذا كان علي يريده هكذا ,, وكله اجتهااد ولاهي غريبه على علي يسويها ,,

إحتراامي ..!!!

[ابو فايح]

اختلف معك فالبيت كاملا يحمل معنى اخر لا اعلم قصده علي العضياني او لا

لكن ليس ما تقول يالدجمياء انها كلمه وأنا فاهم قصدك


هناك بيت جميل ونقض عالمي من علي العضياني رغم قوة بيت السحيمي وغموضه




اشهدوا لك بالصلابه واشهدوا لك بالقيـاده***مار اخاف انك تصوت للعرب في صمد خالي



قوة البيت فالشطر الأول


وكان الرد الرائع جدا من علي


في رقبتك الكلمه اللـي قلتهـا مثـل القـلاده**العتيبي من رجال (ن) يرفعون الرأس عالـي




من بعد هذا البيت اشتد القاف

[حسن إبراهيم الدجيماء]

يالدجيماء ليس شرط في كل مقلب أن يمر .

ومشكلة كلمة تمريرة انها اصبحت مرتبطة بكل معنى ( خزى ) كما يطلق عليه القدماء .

.

لالا ,, تأكد إن مافيها خزى ,, ترى علي محترم ,, ولاهو راعي الخزى ,,

//

إحترااامي ..!!

[علي بن عباد المطيري]

إسمح لي يابوفايح ,,

المقلب ليس معنى غامض حتى نقول ان الرد كان وافي ,, ورد السحيمي حسب مااراه لم يوفق ويدل

على ان المقلب مشى ,, هذا إذا كان علي يريده هكذا ,, وكله اجتهااد ولاهي غريبه على علي يسويها ,,

إحتراامي ..!!!



يالدجيماء بل نقضها السحيمي .





العضياني يقول :


أنت أظنك يالسحيمي فيك طبع وفيك عـاده = حر منزالك على روؤس الشواهيق الطوالي


الحر ماهو الصقر ولكن لفظ فصيح معروف معناه , يستخدمه أهل الجنوب الآن , والشواهيق الطوال أذا فهمتوا الحر تفهمونها .




العضياني الم يقل هي لك ( عادة ) .




السحيمي قال :

( لاتحول عادتك لي ترى العقل الركادة ) .


لاتضع العادة التي اعدت عليها ,تقول انها لي بل هي عادتك انت .

[الصاطي,,]

محاااااااااوره قمة



وشعراء مبدعين جداً




مشكور يا بو فااايح على النقل ولاختيار الموفق







تحياتي للجميع

[ماجد العصيمي]

مع احترامي لكم اتوقع علي مايقول شي الا حاسب حسابه

سواء معنى ولا مقلب

[علي بن عباد المطيري]

لالا ,, تأكد إن مافيها خزى ,, ترى علي محترم ,, ولاهو راعي الخزى ,,

//

إحترااامي ..!!




يعني ماهو مثل خليف بن دواس الله يرحمه



ههههههههههه





الخزى بحدود بسيطة مقبول من البعض , وأنا ضد استخدام الكلمات الخارجة عن الأدب والدين من قبل الشعراء لكن هو شر ابتلوا به بحكم أنه متوارث في هذا الفن وأصبح من ضمن أساسياته التي لايمكن التخلي عنها للأسف .

[حسن إبراهيم الدجيماء]

ياجمااعة ,,

أنا ماأجادل تقديس لعلي ,, أو تنزيل من مكانة رااشد ,, الموضوع كله ومافيه ,, ان علي في بيته المذكور

مرر على رااشد تمريره (( حسب ماأرى )) لم ينتبه لها راشد ,, والدليل ردّ السحيمي ,,

بمعنى : علي بيّن البيت لراشد بأنه بيت عادي وأشغله في جزء من البيت ,, والسحيمي راح يفكر

فالجزئية وترك المعنى كاملاً ,, وربما أشغل الكثير هنا أيضًا ,, والمعنى شريف جدّا ,, حتى لاتروحون

وتفهمونه خطأ ,, ولافيها أهل جنوب ولا أهل شماال ,,

//

إحتراامي ..!!!

[سـعـد الـعـصـيـمـي]

لاهنت يابو فايح على هذه المحاوره ولانستغرب الابداع من ابو فلاح

فهو خير من يمثل منتدى الهيلا ......

[عبدالله الاصعر]

ابوفايح بيض الله وجهك على نقلك للعلوم الطيبه وانت راعيها



والابداع لايستغرب من الشاعر /علي العضياني اللذي يمثل قبيلة عتيبه خير التمثيل صح لسانه مدد بلا عدد


وصح لسان العلم والشاعر /راشد السحيمي مدد بلا عدد



احترامي للجميع

[عطاالله النفيعي]

أنت أظنك يالسحيمي فيك طبع وفيك عـاده = حر منزالك على روؤس الشواهيق الطوالي

هذي ياعلي ,, فيها مقلب وخطير مشى على السحيمي ,, ولكن ابسأل علي إذا كان قاصدها أو لا ؟؟

وأبينها بعدين ..!!

//

إحترااامي ..!!!

اخوي الدجيما الله يرضالي علاك بس

اي مقلب !! تقول عنه !!


أنت أظنك يالسحيمي فيك طبع وفيك عـاده
حر منزالك على روؤس الشواهيق الطوالي


قال السحيمي

لا تحول عادتك ليه ترى العقل الركاده
لا ترد هداج وأنته لا دلي ولا حبالـي


اما من ناحية المحاوره علي فلاح مبدع مبدع الله لايضره من غير المقالب اللي تقول عنها


والسحيمي مبدع وشاعر كبير

[:: محمد النفيعي ::]

صحة ألسنتهم جميعا

[الـحـنـشـ]

الله الله محاورة رائعه بين معلم وطالب ولافيه تمريرات ولا شي لكن دققو في بيوت راشد الله يصلحكم

ابوفايح عافاك الله جزل ولا تجيب الا جزل

وبإنتظاااااار باقي الحفله

[علي بن عباد المطيري]

بعض الناس لو توريهم الشمس قال لا ماهو صحيح .





(( الهجوم الواضح بين الشاعرين ))


لك (( عادة ))


(( الحر ))


(( منزله في الشواهيق العوالي )) .






بعض الناس ركز على عاده يحسبنها دوره , المقصد في الحر وفي المنزل في الشواهيق العوالي , والعاده هي الطبيعه والتعود على شئ معين .



السحيمي رد يالدجيماء معطيك رده بشكل واضح مايقبل الجدال .



لكن من تعلم !!!!!!!!!!!!!!!!!!!!!!!!!!!!!!!!!!!!!!!!!

[سعود العصيمي]

محاورة رااائعه

من الطرفين


واما المقلب اسمح لي يالدجيماء


انه لم يمشي على السحيمي


ومشكوور يابو فايح

[حسن إبراهيم الدجيماء]

ياأخوان الله يرضالي عليكم كلكم ,, أخوان وأعزااء ,, وكلامكم على راسي وأحترم آرآآئكم ,, لكن :

أنا اللي أشوفه مقلب ,, ولا أدري علي له قصد فيه ولا لا ,, وأكررها مليونين مرة ,, لكن اذا كان قاصدها

فهي مشت والله العظيم ,, والسحيمي رده وافي اذا لم يكن فيه مقلب ,, لكن يوحي بأنه لم ينتبه

للمقلب ,, أكرر (( حسب ماأرى )) ,, (( واللهجة لها دور وكبير بعد فيه )) ,,

أرجو من الأخواان نسيان ماحدث ,, وانا ابديت رأيي حسب ماأرى ,, ولايجيني بعد شوي واحد يقول لي

أي مقلب وأي خرابيط ,, المقلب انا اشوفه ,, ومشى بالعربي ,, فلذلك ياليت تعفوننا من الموضوع ,,

وأكرر أيضًا محاروة راائعه ,, (( راشد وعلي )) الله يطول أعمارهم ,,


(( أبوفاايح هذي متى ,, ياليت تعطينا تاريخها ؟؟ ,, ولاتنسى الباقيات ,, ترا فيها سفر والسناني واكيد غير ؟؟ ))

//

إحتراامي للجميع بدون ذكر اسمااء واعذروني على الاطالة ..!!!

[:: محمد النفيعي ::]

محاورة رااائعه

من الطرفين


واما المقلب اسمح لي يالدجيماء


انه لم يمشي على السحيمي


ومشكوور يابو فايح

اوافقك الراي

[:: محمد النفيعي ::]

يالدجيما علي بيته وافي ولايلحقه قصور لكن انت تقول مقلب وحنا نقول مافيه مقلب سوا علي قصد المقلب ولا ماقصد رد السحيمي كان وافي ولامشى عليه سوا كان فيه مقلب ولا مافيه مقلب

[حسن إبراهيم الدجيماء]

أخوي محمد النفيعي ,,

أنا لاأدري حقيقة هو مقصود أو لا ,, لكن إذا كان مقصود فهو مشى حسب مااشوفه من رد راشد ,,

واذا ماهو مقصود فالرد واافي ولاعليه غبااار ,, وهذي المشكلة اشغل راشد في جزيئة وكان الرد عليها

واافي واشغل الاعضاء بعد ,,

//

إحتراامي لكـ ..!!

[:: محمد النفيعي ::]

مقصود ولاغير مقصود :

فيك طبع وفيك عاده
رد السحيمي
لاتحول عادتك ليه
مامشى على السحيمي شي
يالدجيما حنا لنا عيون ونشوف
كان فيه مقلب غير هذا بكون معك وكان مافيه غيره اسمح لي
ودام انك مصر انه مقلب ياليت توضحه لنا وتبرر موقفك

[حسن إبراهيم الدجيماء]

أولًا : ,, إسمح لي مارااح أوضحه ,, الا اذا كان علي قاصده ,, << ابسأله ,,

وثانياً : ,, انا قايلها كم مرة ,, هو اشغل السحيمي واشغلكم بعد معه ,, شوف كلكم رحتوا للعادة وتركتوا

البيت كاملاً ,,

أعذرني عن التكملة ,, حتى اجل قريب ,,

//

احترااامي ..!!

[ماجد العصيمي]

يالربع المقلب ماهو في كلمة (عادة) للتوضيح فقط

وعليكم الاستنتاج ومن وجهة نظري راشد يرجع عليه بيته اللي يقول فيه لا تعود عين صاحبنا مثل عين الجراده

ومن وجهة نظري ايضا ان المقلب مشى واللي غطى المقلب كلمة (عاده)


دمتم بود

[علي بن عباد المطيري]

يالربع المقلب ماهو في كلمة (عادة) للتوضيح فقط

وعليكم الاستنتاج ومن وجهة نظري راشد يرجع عليه بيته اللي يقول فيه لا تعود عين صاحبنا مثل عين الجراده

ومن وجهة نظري ايضا ان المقلب مشى واللي غطى المقلب كلمة (عاده)


دمتم بود



صحيح ياشبل مرجحين الموازين , والعاده هي الطبيعه والاعتياد على شئ معين .


كلمة الحر , وايضاً منزله في الشواهيق الطوالي , هي التي عليها الكلام ,



والسحيمي رد برد واضح وترفع عن الرد بنفس الاسلوب لكنه أوضح تنبه بدون أي شك , وقال ( لاتحول عادتك لي ) أي الشئ الذي اعتدت عليه انت لاتحوله وتجعله عادتي لي والصحيح أنها عادتك أنت .

[علي بن عباد المطيري]

الناس وش فيهم يحجرون على نقاط لاتستحق التوقف .


يكفي الاشارة الأولى مني بدلاً من توسيع النقاش لصفحات من أجل كلمة واحدة .

[ܓܨ عبدالله البرقاويܓܨ]

ياسلام على المحاوره الراائعه
تشكر على طرحها
احترامي

[نوآف الغنامي]

يا سلآم سلّم





طاااااروق عال العال





يحمل كل معاني الابداع




ابو فلآح الله يوفقك
وصح لساااااااانكــــ مدد بلآ عدد





وراشد شاعر كبير وصح لسانه






استمتعت بقراءة هذا الطارووووووق




ابو فايح الله الله بالباقي :)



لآ تخلي شي

[ابن المحايا]

اتمنى من كل شخص عنده وجهة نظر او معارضة على وجهة شخص ما



ان يتحلى باللباقة لاني اشوف بعض الردود للاسف هدفها المعارضة لاجل المعارضة



وانتقاد الشخص نفسه لانه قال وجهة نظره وهو حر في ذلك

[أسير القوافي]

بيض الله وجهك يابو فايح :)



أنت مكسب في صرح شامخ وركن من اركانه :) .. الله لا يحرمناك << يقلَد الدجيما :)




وننتـظر مايدليه دلوك في كل وقت ..





تحيَتي

[ابوتيجان]

طاروق الشاعرين نظيف وجزل

واعجبتني ثقة السحيمي في نفسه من خلال بيوته واعجبني علي في فتله للبيوت عند تطرقه لعدة مواقف تخص موقع وشاعرية السحيمي في ساحة المحاورة

[راشدالعضياني]

أنت أظنك يالسحيمي فيك طبع و فيك عـاده *حرّ منزالك على روؤس الشواهيق الطوالـي



البيت فيه مقلبين وليس مقلب غير كذا مافيه والي يقول لا ماعنده سالفه مع احترامي له

ومستعد اراهن على ذلك



لا تحول عادتك ليه! ترى العقل الركاده*لا ترد هداج وأنته لا دلي ولا حبالـي

وكان رد السحيمي واضح انه مشكك في البيت وبالاصح الشطر الاول

وفات علية الشطر الثاني لانه زي ماقلت شكك في الشطر الاول وراح تفكيره فيه وترك الشطر الثاني




وصح الله لسانهم

[سرحان 511]

.

..
ان ذهبنا للمقالب وجدنا ان البادي السحيمي

اشهدوا لك بالصلابه واشهدوا لك بالقيـاده***مار اخاف انك تصوت للعرب في صمد خالي

الصلابه ليست القوه وانما تعني (صليب)

والقياده لاتعني القياده بمعناها الصحيح

ثم ناتي الى الشطر الاخير(مار خاف انك تصوت للعرب في صمد خالي)

وهو عطف يؤكد ان الشاعر نيته سيئه في كلمة (صلابه) و(قياده)

ولان عزله عن العرب وجعله المصوت لهم والمنادي لهم يدعم التفسير


رد علي العضياني:

يفسر المعنى لكنه لايعتبر رد ذو حدين (كقول ماعليك زود)

(أو اتيانه من جهة سكان جنوب المدينه أو المثل السائد على قبيلة حرب (من غرب حرب)))

رد السحيمي


لا تعود عين صاحبنا مثل عين الجراده

ينصح علي عن الشك في النفس وان قصده ( السحيمي) شريف

يليه رد علي :

نعرف المقرود طبعه ما يجـوز مـن القـراده***فالزمن دمـه حـلال أحـل مـن دم الغزالـي

لاينفي الشك في النفس ولايزرع الثقه فيها لان السحيمي نصحه عن ذلك

ومن المفترض ان يؤكد علي للسحيمي ثقته في نفسه

يليه رد السحيمي :

ما يجوز أحط يدي بين رأسك والوسـاده***إن رجعنا للعلـوم الأولـه يـا هملالـي

بمعنى لا اريد ان اصحيك من منامك فأنت مازلت في غفوه

وبمعنى الاستفزاز وزرع الشك في نفس المقابل وفي معنى البيت

بعد ذلك رد علي:

أنت أظنك يالسحيمي فيك طبع و فيك عـاده؟***حرّ منزالك على روؤس الشواهيق الطوالـي

وهذا رد متأخر عن وقته وكان من المفرتض ان يرد في بداية المحاوره

حتى لو كانت الكلمه مستهلكه واعيدت لعشرات المرات لكن نعتبرها ماشيه لظروف الموقف ولخطورة السحيمي

اخيرا بيت السحيمي الاخير فيه توجيه ونصيحه لا ادري هل هي صادره عن قناعه

ام صادره من باب التقليل من الخصم

تحياتي,,,

..

.

[ابوتيجان]

.

..
ان ذهبنا للمقالب وجدنا ان البادي السحيمي

اشهدوا لك بالصلابه واشهدوا لك بالقيـاده***مار اخاف انك تصوت للعرب في صمد خالي

الصلابه ليست القوه وانما تعني (صليب)

والقياده لاتعني القياده بمعناها الصحيح

ثم ناتي الى الشطر الاخير(مار خاف انك تصوت للعرب في صمد خالي)

وهو عطف يؤكد ان الشاعر نيته سيئه في كلمة (صلابه) و(قياده)

ولان عزله عن العرب وجعله المصوت لهم والمنادي لهم يدعم التفسير


رد علي العضياني:

يفسر المعنى لكنه لايعتبر رد ذو حدين (كقول ماعليك زود)

(أو اتيانه من جهة سكان جنوب المدينه أو المثل السائد على قبيلة حرب (من غرب حرب)))

رد السحيمي


لا تعود عين صاحبنا مثل عين الجراده

ينصح علي عن الشك في النفس وان قصده ( السحيمي) شريف

يليه رد علي :

نعرف المقرود طبعه ما يجـوز مـن القـراده***فالزمن دمـه حـلال أحـل مـن دم الغزالـي

لاينفي الشك في النفس ولايزرع الثقه فيها لان السحيمي نصحه عن ذلك

ومن المفترض ان يؤكد علي للسحيمي ثقته في نفسه

يليه رد السحيمي :

ما يجوز أحط يدي بين رأسك والوسـاده***إن رجعنا للعلـوم الأولـه يـا هملالـي

بمعنى لا اريد ان اصحيك من منامك فأنت مازلت في غفوه

وبمعنى الاستفزاز وزرع الشك في نفس المقابل وفي معنى البيت

بعد ذلك رد علي:

أنت أظنك يالسحيمي فيك طبع و فيك عـاده؟***حرّ منزالك على روؤس الشواهيق الطوالـي

وهذا رد متأخر عن وقته وكان من المفرتض ان يرد في بداية المحاوره

حتى لو كانت الكلمه مستهلكه واعيدت لعشرات المرات لكن نعتبرها ماشيه لظروف الموقف ولخطورة السحيمي

اخيرا بيت السحيمي الاخير فيه توجيه ونصيحه لا ادري هل هي صادره عن قناعه

ام صادره من باب التقليل من الخصم

تحياتي,,,

..

.


الكلمات ( الصلابة ) ( القيادة ) على حسب تفسيرك سوف تكون معسوفة وهذا ضعف يحسب على الشاعر ولايحسب له هذي نقطة.

النقطة الثانية بداية البيت يقول ( اشهدولك ) والشهادة إلى المحمودة عكس الشاهدة على المذمومة والشعر له ميزان وليس عجن عجين

لذلك اعيد واكرر واقول الطاروق نظيف من الجانبين ويلعبون على هدف اكبر من مقالب

[فايز بن سرحان الثبيتي]

الوكاد ان المحاورة قيمه وفيها نديه وكان علي فلاااح خصم قوي وعنيد للسحيمي الذي يحمل الخبره الكبيره في ميادين المحاورة




بيض الله وجهك يابوفايح "

[عيد بن مرضي]

الله الله

علي ابدع وكأن لا يوجد فرق بين تاريخ السحيمي وبداية علي العضياني


وسلمت يمناك ابو فايح

[جبل طويق]

بسم الله الرحيم الرحيم




السلام عليكم ورحمة الله وبركاتة الاخ ابوفايح شكراً على النقل وفي الحقيقة انا ماني عتيبي ولكن وش راي الاخ الدجيماء في بيت السحيمي (مايجوز احط يدي بين راسك والوسادة)ترا مانيب حربي بعد

ولكن السحيمي شاعر كبير وعلي فلاح العضياني ماعرفتة الا في منتدأ الهيلا ويشرفني التواجد معكم

ومشاركتكم وشكراً للجميع في محل الجميع ودمتم

[خصيم الاجناب]

لاشك ابداع من علي العضياني امام شاعر كبير كالسحيمي


وفعلا علي استدرك نفسه وتفوق فالاخير




واصل ياعلي مسعاك الطيب

[حاكم الغنامي]

الله الله


صح لسانكــ وسلم بنانكــ يابو فلااااح



ولاهان راشد وصح لسانه

ابدااااع

[عواد ناجم]

راشد السحيمي




ما يجوز أحط يدي بين رأسك والوسـاده = إن رجعنا للعلـوم الأولـه يـا هملالـي

[مرزوق حمدان العتيبي]

..

.

ابو فايح متميز دائماً ..

محاوره فاخره .... السحيمي شاعر كبير ... ومايقدمه غير مستغرب
وابو فلاح ... متميز وشاعر قادم بقوه ..ابدع في هذه المحاوره ايما ابداع..
فلله دره

[ابو نايــف]

لا هنت يابو فايح على النقل


ننتظر منك المزيد من المحاورات

[ابو فايح]

حيالله الجميع


شاكر لك ردودكم وتفاعلكم مع الموضوع

[الجوراسي]

العضياني هذا داهيه

وتذكرني بيوته ببيوت هلال السيالي الله يرحمه

[رعد الروقي]

فرقبتـك الكلمـه اللـي قلتهـا مثـل القـلاده
العتيبي من رجال (ن) يرفعون الـرأس عالـي
أنت ما شفناك لين إن الهـواء ذعـذع بـراده
ما أنت إبن غانم ذياب و لا أنت ابو زيد الهلالي



لا تعود عين صاحبنا مثل عين الجـراده
لا تغلاّ يالعتيبي وانت طول الوقت غالي
لا تذم الفارس اللي ما يحول عن شداده
ما يصير أتحطنا بالشمس وأنته بالظلالي


نعرف المقرود طبعه ما يجـوز مـن القـراده
فالزمن دمـه حـلال أحـل مـن دم الغزالـي
المناصب تشغل أصحاب المعالـي و السعـاده
و أنت ما تحسب من أصحاب السعاده و المعالي



لله درك يا علي


مبدع مبدع


وشهادتنا فيك مجروحة ولا انت في حاجتها



سلمت يابو فايح


وصح لسانك الشاعرين


علي العضياني // راشد السحيمي

[بيكهام]

شكرا يابو فايح عانقل


وصحت السنة الشعار علي و راشد

[ابوزبن]

كلهم شعار ماقصرو وابدعو