الجندي اللي بين يوم و ليل رقّوه لعميد .. سلطان بن دحيم هلا بك !!

[علي الشهراني]

السلام عليكم



و صباح الخير للجميع




سلام تسليمة غلا منها نفيد و نستفيد=و الطيّبه لهل القلوب الطيّبه نبدابها
الجندي اللي بين يوم و ليل رقّوه لعميد=الله يعينه للبنادق لا هوى مضرابها

[سلطان بن دحيم]

وعليك السلام

هلابك



يا مرحبا بالغالي اللي بالمعرفه له رصيد = والطيبه بيني وبينه ما يقفل بابها
اللي يحصل شي يستاهل هذا العلم الاكيد = واعرف ترا النيران ماشبت لالا شبابها

[علي الشهراني]

الله الله




دام البقا يا صاحبي سلطان و اسعد يا سعيد=اصحابكم و اصحابنا و اصحابنا و اصحابها
لونّها بالطيب قلنا يا عسى حظه يزيد=لكنها بالواسطه يا لعنبو من جابها

[حسن إبراهيم الدجيماء]

الشهرااني :

الجندي اللي بين يوم و ليل رقّوه لعميد ** الله يعيـنـه للـبـنـادق لا هـــوى مضـرابـهـا

سلطان بن دحيم :

اللي يحصل شي يستاهل هذا العلم الاكيد ** واعـــــرف تـــــرا الـنــيــران مـاشــبــت لالا شـبـابـهــا

--------------------------------------------

ياسلام ياسلام ,,

الشهرااني + ابن دحيم ,,

صحت الالسن والقلوب ,,

بيض الله وجيهكم ,, وعساكم على القوة ,,

طاروق بين العمالقة ,, يستوجب المتابعه ,,

متااابع للفاائدة والمتعه ,, !!!!

[علي الشهراني]

و الله انك العملاق بتواجدك يا الدجيماء



مشكوووووووور و ابيض وجه



و متاااابعتك نوماااااااااااااااس

[سلطان بن دحيم]

انا معك صاحي فكر وانته ذكي ما انته بليد = ترا الرساله لومها يرجع على كتابها
هذا غبن والا حسد بالله قلي وش تريد = ترا السيوف البيض سلتها تعز نصابها

[سلطان بن دحيم]

الدجيما

صح بدنك

ومرورك مكسب ومتابعتك شرف لاهنت

[علي الشهراني]

الضيف في حكم المضيّف كان ذا بيت القصيد=تراك يا سلطان من بين الرجال اولابها
دام الصعيدي ضايعٍ ماله و حاله فالصعيد=ما فيه داعي نفس بو نوّاس لا يشقابها

[سلطان بن دحيم]

الضيف ما قلط على يا صاحبي قدر العصيد = والشاذليه كيف وتقدم على شرابها
اربع سنين تقدم اوراقك على ساع البريد = ولاحصل مردود يا شهران ويش اسبابها

[علي الشهراني]

ان كان ضلعك من حجر انا ترا ضلعي حديد=الشاذليه كيف و الشرهه على صبابها
قد قلت لك لكنّ عيّت تستوي روس العبيد=الاوله في ضرسها و الثانيه في نابها

[سلطان بن دحيم]

ما فيك قاصر يا ولد شهران وحزامك جويد =واليا زهمت اجاوبك والخيل من ركابها
مال الحروب الرجال اللي لهم باس ٍ شديد = وام الكباير ما حسبنا يا العميل حسابها

[علي الشهراني]

الشك زايل و الغلا و الطيب للطيّب يزيد=و امّا الردي يبشر بكفٍ حاميٍ مشعابها
الحرب راحت سطوته من يوم راح ابن الوليد=ما باقي الّا عالمٍ مثل الدبَش في غابها

[حسن إبراهيم الدجيماء]

سلطاان بن دحيم :

مال الحروب الرجال اللي لهم باس ٍ شديد ** وام الـكـبـايـر مـــــا حـسـبـنــا يـــــا الـعـمـيــل حـسـابـهــا

شكلك ناسيها يابن دحيم (( إلّا )) ..!!! بعد ( الحروب ) ,, ولاانا غلطاان ؟؟

الشهرااني :

الحرب راحت سطوته من يوم راح ابن الوليد ** مــا بـاقـي الّا عـالـمٍ مـثـل الـدبَـش فـــي غـابـهـا

----------------------------------------------------

الله الله ,,

لله دركما ,,

مافيه امل يرجع ابن الوليد ؟؟

مجبوور اتااابع ,,

[سلطان بن دحيم]

الله يوفقنا لقول الصدق والراي السديد = وانا ما لبست الرجال ثياب غير ثيابها
تبقى المواقف عند اهلها ما حصل علم ٍ جديد = وتبقى الجبال جبال والشاوي يخاف ذيابها

[علي الشهراني]

اليا رضى راشد و راشد ما رضى عبد المجيد=يا راعي اللعبه ترى اللعبه على لعّابها
ان كنت خايف لا تبين الشمس و يذوب الجليد=ارتاح في ظل البيوت و لا تهد اطنابها

[علي الشهراني]

ارحب ارحب يا الدجيماء


و ان شاء الله يرجع


مشكوووور على متااابعتك


و يعلم الله انها مصدر فخر و نومااس يا حسن

[سلطان بن دحيم]

الناس هاذا طبعها واللي نظر عينه بعيد = لا يحسب انه يأكل التمره وهي فجرابها
عطيتك العلم والوكاد وليش يوم انّا نعيد = وترا البسيطه بأمر ربي راسيه بهضابها

[علي الشهراني]

يا شيب عينك كان حلمك وسط مردوم الجريد=القوم وصلت للفضا وانته بعَد بترابها
السارق المزّاح ما ينفع معه كثر الجحيد=و ان كان تاب و عاد قلنا صلّ في محرابها

[سلطان بن دحيم]

صح لسااااااااااااااانك شرفتني باللعب معك


ولنا لقاء اخر ان شاء الله


فمان الله

[علي الشهراني]

الله يحييك يا سلطاان و صح لسانك و بدنك



و مشكوور على قبول الدعوه



و الجااايات ابرك

[زياد المزرمي]

الله الله


الشــهــرانــي && ابــن دحــيم


صح اللسنتكم يا مبدعين


استمتعنا بقراءة الطاروق الجزل

[فايز بن سرحان الثبيتي]

الشهراني \ سلطان بن دحيم



صحت السنتكم على هالابداع "

[علي الشهراني]

زياد الشطيطي


ابن سرحان الثبيتي




مرحبا بكم ملايين


و صحت ابدااانكم


مشكووووووورين

[فهيد الايدا المورقي]

سلطان بن دحيم


الشهراني



صحت السنتكم ملايين


طاروق كايف


تحيتي

[عز القاف]

الشهراني

شاعر المنتدى الاول بدون منازع

قليل في حقك وسام ذهبي

حتى وسام النخبه ما يبلغ مستواك

شاعر وجودك مكسب للمنتدى

صح لسانك واعتلأ شأنك




سلطان دحيم

شاعر مبدع بلاشك

صح لسانك واعتلا شأنك

[علي الشهراني]

بناخي الايداء



حياك الله و مشكووور



و مرووورك يكفي

[علي الشهراني]

عز القاااف


الله يحييك و مرحبا بك


و وسامي و فخري في معرفة الرجال شرواااك


و شهادتك لي اعتبرها اكبر وسااااااام


اكرر و اقوول مشكوووووووور

[سلطان بن دحيم]

زياد الشطيطي


ابن سرحان الثبيتي


بناخي الايداء


عز القاف


صحت ابدااانكم


مشكووووووورين