سفير القوم في حرب و الّا في سلامي .. الجلمود هلا بك !!

[علي الشهراني]

مساء الخير للجميع



سلام الله سلامٍ يخص الشيخ جلموود=سفير القوم في حرب و الّا في سلامي
ترا اللي يفعل الجود فاللي يجهل الجود=سواة الركعه اللي على حد المقامي

[فهد الشيباني]

الله الله

صح السانك يامبدع

وبنتظار الجلمووود

متاااابع ..

[علي الشهراني]

ارحب ارحب يا الشيباني



و مشكوور على متاابعتك

[الجلمود]

هلا يامرحبا رحب يشمل كل موجود=تراحيب الوفا تشمل الناس الكرامي
يمين اهل الكرم جودها ماهوب محدود=ولاترجي من الناس شُرْب ولاطعامي

[:: محمد النفيعي ::]

الله الله


في صف الشهراني



ولاهان جلمود

[الجلمود]

شبل شيبان-محمد النفيعي

متابعتكم شرف لنا

[علي الشهراني]

يدوم الك البقا و انتبه و السيف محدود=على حده تبا تنكسر صم العظامي
ثمان سنين و الناس ترجي طلة العود=و بعد ما بان بانت خفافيش الظلامي

[علي الشهراني]

ارحب ارحب يا النفيعي



و مشكووور و الصف و راعيه يزهاابك

[الجلمود]

على صم الصخر سيف ابن شهران مجرود=يحسب ان الصخر يعرف السيف الحسامي
من السته وعشرين وين مدور الفود=حرامك في الحرم يخطفه واحد حرامي

[علي الشهراني]

ليا قابلت يا صاحبي جلمود مقروود=و لو سلمت لا ترتجي رد السلامي

لونّ القوم كلٍ بذل فالوضع مجهود=ما كان البوم عشّا مع فرخ الحمامي

[الجلمود]

ليا حصلت لي واحدن مايطلب الزود=على دقنه ويمناه ماارهيت اليدامي
ياذيب الارض دون السماء براق ورعود=مزونه تحجب النور وتزيد الظلامي

[علي الشهراني]

من اوّل شيخة القوم فاللي يحمي الذود=و ذا الحين اصبحت رميةٍ من غير رامي
عسى حامد و حمّاد تسمع علم محمود=و تطلع مثل ما يطلع الحر القطامي

[الجلمود]

زمان اول تحول وحاوي صار مردود=رضي بالدون عقب الشداد مع السنامي
عساها البندق الي تغص بكل عبرود=واعيش بدونها في الخلا وابني خيامي

[الجلمود]

عن اذنك دقايق بروح

اتعشى عند هرفي

وترى العشى ماهو هرفي

هههههههه

[علي الشهراني]

على ويش التحوّل و ريع الحق مقعود=مع قومٍ غدى طبعها مثل النعامي
انا مالي و مال الذليل اللي بلا زنود=يحسب الوقت كله مثل حلم المنامي

[الجلمود]

انا حاولت اعدل وابدل كل نمرود=واهل بيشه يغنون بلحون الغرامي
علومك حطها في كفن والقبر ملحود=ويوم الموت من يارده ورد الضوامي؟!

[علي الشهراني]

علومك لو تحوّل تراها سهود و مهود=و اهل بيشه كرامٍ مع الناس الكرامي
الا يا بوش حبل القضيه فيك مغقود= تحسّب شعب بغداد يشبه فيتنامي

[ابن سحمه]

صح الله لسانه

[علي الشهراني]

مشكووور على مروورك يا ابن سحمه

[الجلمود]

للا الي تحت نخلتك ماخليت عنقود=اكلنا تمر بيشه وذكينا التهامي
رموش العين صفين دون عيونك السود=ومرودها من النار والبارود حامي

[الجلمود]

ابن سحمه

صح الله بدنه

[علي الشهراني]

عليك الهون قدّام ناصل كسرة العود= و اخذ غبرة سفر و السناني و الزلامي
ابو عمّار قصره من الايام مهدود=على شانه يبدل حلاله بالحرامي

[الجلمود]

ترى قيد المطيه معك ماهوب مشدود=مطول قيدها والعصى بعد الخطامي
جمالن حارنه كيف تنقل حمل مفرود=عجز فيها المداوي بعد طال الهيامي

[الجلمود]

الشهراني


صح لسانك

شاعر علم لايشق لك غبار

تشرفت بمجاراتك


والخاتمه عندك

[علي الشهراني]

بيض الله وجهك يا الجلموود


ما يحتاج ما عقب كلامك كلام


صح الله لساانك


و الفائده لي في مجاراتك


اشكرك على قبول الدعوه


و الى لقاء قريب

[رمح مطير]

صح لسانك الشهراني + وصح لسانك الجلمود

بسراحه محاوره ممتعه لله دركما تعجبني مثل هذه المحاورات

اللتي تستمر بين الشعار بدون انقطاع او تاخير حتى تنتهي

ماهو مثل بعض الشعار الله يهديه اخذن المحاوره بالتقصيد

المريح على شكل دفعات يرد ثم يترك زميله ينتظره على الصفحه

لين حتى يمل بدون مراعات لشعور زميله او مراعات الوقت ولا يرد

ألا بعد عدة ساعات أو بعد يوم هذه ماتعتبر محاوره : هذه وجهت نظري

أرجوو من اللي يقراها ان يتقبلها بصدراً رحب وتوخذ بعين الاعتبار : تحياتي للجميع