وش رايكم.. الدعوى للجميع..

[مرزوق حمدان العتيبي]

...
الله يمسيكم بالخير جميعا..
والله يالربع ان لي فتره ليست بالقريبه
عن المحاوره واليوم جا في بالي اني اخذ محراف
مع اطرف واحد منكم.... والسبب ان كلكم عيال عمي وغالين
بدون استثناء لذلك ... اللي عنده استعداد يشاركني
يعلن حضوره ... من شان نبتدي وسيمتنا..
والله يحفظكم.
محبكم
ابو محمد

[وصل العطياني؟؟؟]

هلا وغلا ...

إن شاء الله نشوف من يكمّل الثنائي ...

وتمتعونا بروائعكم ...



تحياااااااااااتي

[منصور بن فهيد]

مساك الله بالخير يامرزوق العتيبي وعطنا الوسيمه

[مشتــــاق]

يالله يا شعار


وحنا متابعن

الليل الليل


انا ماسك صف بس بعد ما اشوف بدعكم

[وصل العطياني؟؟؟]

متابعين معكم ...

الليل يا رجال الليل ...


مشتاق / إكسر الحطب في النار طول ما يبدعون نبى نسخّن :)



تحيااااااااااتي

[مشتــــاق]

والله البرد زاد والشعار

ما تحركوا

يالله يا عيال



والا قمنا عليكم انا ووصل
:)

[مرزوق حمدان العتيبي]

الله يسعد مساكم بكل خير..
يشرفنا حضوركم ويرفع قدرنا تواجدكم..
والوقت طرف ....
ولكن استلم يالنويري والله يحييك


مع نهاية عام وابداية العام الجديد = ياسلامي من هجوس الشعر والشوق زاد

شوق مثلي للسوالف مع الطيّب يزيد = يالعطياني نبي منكم اعلوم ٍ جداد

[وصل العطياني؟؟؟]

الله الله ...

هيّا تحرّك يا مشتاق ...

واصــلوا لا هنتوا ...



تحيااااااااااتي

[مشتــــاق]

مع نهاية عام وابدايـة العـام الجديـد ياسلامي من هجوس الشعر والشوق زاد

شوق مثلي للسوالف مع الطيّـب يزيـد يالنويري ننتظر منكـم اعلـوم ٍ جـداد




الداب الداب



الصف تحرك

وانا في صف مرزوق ولا يهون اخويه النويري

[وصل العطياني؟؟؟]

أنا في الطرف المقابل يا مشتاق :)


تحيااااااتي

[مرزوق حمدان العتيبي]

الاخوان الفضلاء
وصل العطياني
ومشتاق ...
تواجدكم نعدّه فخرنا
وفي الحقيقه هو مصدر سعادتنا ...

اخوي مشتاق حملتني شرف وجودك في صفي لاعدمتك..

[بعيـد المرامع]

محاوره ............. الظاهر انها اول محاوره ..في عــــام 2005 ميلادي ...

يالله ياشعار .. متابعين .. وماسكين الصفوف ...

بعيد المرامع

[مشتــــاق]

يا وصل














ياوصل




شاعركم ابطا علانا


:)


تراني فحمت

[وصل العطياني؟؟؟]

الغالي مرزوق ...


بدون مقدّمات / تفضّل :



من هجوسٍ دايم تقول لي هل من مزيد=مرحبا ترحيب يقدح كما قدح الزناد
مار يا مرزوق عيّدت وإلا ماش عيد=كان عيّدتوا نبى نعرف أيّام العــَيــَاد




تحياااااااتي

[مرزوق حمدان العتيبي]

غاية المنى يابو مشهور
شاعر عملاق ومنك حنا اللي نستفيد
استلم سلمك ربي وابقاك...

.....

والبقا فالك ومع شاعر ٍ مثلك عنيد = الله يجيب السلامه ويحصل مستفاد
مانعيّد مع هل الكفر والدين الزهيد = عيدنا معروف ياوصل واعطيك الوكاد

[وصل العطياني؟؟؟]

ما عليك زود يالغالي ..

إستلم :


أنت يا مرزوق يمكن تفيد وتستفيد = من نهار إنــّك تعلويت في ظهر الشّداد
والمسافة وِدّها حزم رأس وقطع بيد=كمّ طرقي يرسلونه ولا جاء فــ "المراد "


تحيااااااااااااااتي

[مرزوق حمدان العتيبي]

الله الله


المواهب عانها والنفس عندي بعيد = الله انه يكثر الخير ويعم البلاد
والله انا ماذخرناك يالجهد الجهيد = والفروسيّه تبيّن ليا اشتد الطراد

[إبن مفلح]

واصلووووا ياشعارنا ...

متابعين ومستمتعين ...



تحياتي

[وصل العطياني؟؟؟]

لا هنت يا بن مفلح ..

مرورك يسعدنا بلا شكّ ...


تحياااااااااتي

[وصل العطياني؟؟؟]

إستلم يا مرزوق لا عدمتك :



آخر الطرقة يبين النحاس من الحديد=الحديد اللي تســوّى به سيوفٍ حداد
والعباد تريد والله يدبـّر ما يريد=والبشر ترضى بما يقسمه ربّ العباد

تحيااااااااتي

[مرزوق حمدان العتيبي]

الله الله
عليــــــــــــــــــك..


كلنا نبغى الفخر والهدف بيت القصيد =والعرب مايخلطون البياض مع السواد
ياوصل كل المباني تبي ساس ٍجويد = والبناء معروف مايستوي مثل الهداد

[وصل العطياني؟؟؟]

الله الله ..

إستلم لا هنت :


موت يا مرزوق حتــّى نقول إنــّك شهيد = موتك يريّــح عتيبة هذا العلم الوكاد
إضربتك أم الركب وإضربتك ام العبيد = وفــْرحوا ربعك بموتك لكنْ ما الله أراد

تحيااااااااااااتي.

[مرزوق حمدان العتيبي]

هلا وغلا فيك يابن مفلح..
يسعدنا ويفرحنا تواجدك..
اخوك...

[مرزوق حمدان العتيبي]

ياسلام ياسلام
استلم لاهنت...

الاجال مقدره مالنا عنها محيد= راضي ٍ في قسمة الله عليه الاعتماد
انت منت بن الثبيتي ولا الشاعر رشيد = طيع شوري لاتكابر ويعميك العناد

[وصل العطياني؟؟؟]

الله الله ..

إستلم يا بعد حيي :)



آه يا مرزوق يا بعد مكـّة عن قديد = مثل ما تفرق عيون العباد عن الجراد
مير أنا وضـّحت رأيي ولا يحتاج أعيد= تفهمه وإلا تروّح وروحة قوم عاد


تحيااااااااتي

[مرزوق حمدان العتيبي]

...
..
.
الله اكبــــــــــــــــــر
استلم يابعد حيي وميتي :)



الله انه يرزق الناس بالحظ السعيد = لجل بن مشهور يفرح ويرتاح الفواد
الحكاوي ماتزوّد لقايلها رصيد = كيف ودك تغزي القوم ماعندك عتاد

[الــوآفــي]

ابدااااااااع


ومتااااابعه

[وصل العطياني؟؟؟]

لا هنت يا ذيبان ..

الظاهر نبى إنـّوشك كم بيت ههههههههههه



تحيااااااااااتي.

[وصل العطياني؟؟؟]

إستلم يا مرزوق لا عدمتك :


إدع لا يدري عن دعاك زيد ولا عبيد = طالبك تدعي عليهم ولحّــقهم زياد
من معه رمح الزناتي وسيف بن الوليد=قادرٍ يهــْجد على القوم يا مال الهجاد



تحياااااااااتي

[مرزوق حمدان العتيبي]

..
ذيبان ماعليــــك زود ياعصابة راسي..
دمت وادم الله وجودك...
شكرا لك على المتابعه والتشجيع
والله يخارجنا من هالقارشه
:)

[مرزوق حمدان العتيبي]

.....
ياسلام عليك
......
استلم لاهنت


المدح ماهوب زايد بقدرات البليد = والمعالي ماتوصل بغير الاجتهاد
لو معك صبر المهادي وثروات الـــ (...)= يمكن انك ترضي الناس في وسط المزاد

[وصل العطياني؟؟؟]

إستلم لا هنت يالغالي :


منت صاحي لين تونس لســِع خضر الجريد=تحسب إن الوقت كلّه برادٍ في براد
النهاية شدّ حيلك .. هذا الرأي السديد= وإلاّ لا تنشب بثوبي كما شوك الكــتاد


تحياااااااااااتي.

[وصل العطياني؟؟؟]

الشاعر الكبير مرزوق الدغيلبي ..

تشرّفت بالمحاورة معــك ..

وشهادتي فيك مجروحة ...

عموماً أعذرني على التقصير ...

وتقبل خالص الود..


تحياااااااااتي

[مرزوق حمدان العتيبي]

إستلم لا هنت يالغالي :


منت صاحي لين تونس لســِع خضر الجريد=تحسب إن الوقت كلّه برادٍ في براد
النهاية شدّ حيلك .. هذا الرأي السديد= وإلاّ لا تنشب بثوبي كما شوك الكــتاد


تحياااااااااااتي.


استاذي العزيز
الشهاده منك فخر واعتزاز
فمع الشعراء امثالك نبدع
ومنهم مازلنا نتعلم...
القصور عنك بعيد لاعدمتك ...

شكرا لك على اتاحة الفرصه..
اخوك.

[قرناس الصبيحي]

بيض الله وجيهكم جميعا
مرزوق وانت يا وصل
لكن يامرزوق
ان شاء الله بيني وبينك هااا لاتنسى

تراني ابى ابلش نفسي ممعكم وانتم عيال عمي غاليين
نمون على ...........

[مرزوق حمدان العتيبي]

....

الصبيحي لاهنت
وبيض الله وجهك...
تحياتي

[الفـــايز]

طاروق غير وشعار كبار .

[سعد بن مطلق المقاطي]

صح لسان الشاعران
الكبيران القديران
مرزوق +واصل
متابعين

[مرزوق حمدان العتيبي]

...
.
وحنّا بعد متابعين ياسعد :)

...

مشكور يالفايز ... يوم عيد ان نرى لك مثل هالتواجد ...
...