فيصل الرياحي وعيضه الثبيتي (محاورة رائعه)

[محارب الزلّه]

محاورة جمعت بين الشاعر الكبير فيصل الرياحي رحمه الله والشاعر عيضه الثبيتي عام 1428هـ

عيضه الثبيتي



هلا يامرحبا من عزوةٍ لن جات للأفعال=تعلّى صيتها في حاضر الدنيا وماضيها
يابن منصور راح العيد بعد أقفى شهر شوّال=وذا القعدة وذا الحجّه ماندري وش يجي فيها؟

فيصل الرياحي


يدوم الك البقاء والمرجله نوماس للرجال=وكلمة نعم تاج للرجل يحملها ويحميها
عسى ربي يعزك يا وطنّا مضرب الأمثال=لو أن العنصريّه شفتها تومي بأذانيها

عيضه الثبيتي

صحيح أن المواقف يالرياحي مثل رأس المال=وكلمة نعم يافيصل تبيّض وجه راعيها
عسى ربي يعزّ بلادنا وآل السعود ظلال=وحنّا أهل البلاد اللي تشرفنا مباديها


فيصل الرياحي

للصف الجيش قالوا من هو اللي يشرب الفنجال؟=بعضهم مايبي الفنجال والدلّه وطاريها
ولا ياثبيت ياللي تفعلون الطيب كيف الحال؟=انا عندي هديّه دوّروا لي من يوديها


عيضه الثبيتي


للصف الجيش حنّا نعرف الرجلي من الخيال=ندوس النار لو النار تحرق رجل واطيها
ترى كل الدول فيها التواصل صار بالجوال=يكود أربع دول ماني مسمّيها بأساميها


فيصل الرياحي

ترى الأعمال بالنيّات والنيّات بالأعمال=وبيت الشعر في بطنه رصاصه عاش راميها
ليا جاء فالسماء برق وصواقع تقطع الأرسال=لكن أخذ الهديه ودّها لو ما أنت راضيها

عيضه الثبيتي


يقولو الدعاوي مبتداها حطّت المعدال=وبعدين القضيّه تنتهي من عند قاضيها
ولا يافيصل العيّه عرفنا حيلة المحتال=هدايكم تبيها كاش والله ماندانيها

فيصل الرياحي

سمعت الرجل مير المشكله مدري وش اللي قال=بعد قام يتلفت فالصلاة اللي يصلّيها
ياشاعر من قبيلة طيّبه ما في العلوم جدال=أخاطب لي رجالاً كلمتي تعرف معانيها



عساها تنال أعجابكم

[شمروخ ابن عايد]

يالسلام على تركيبة ومعنى هذا البيت :


يابن منصور راح العيد بعد أقفى شهر شوّال
وذا القعدة وذا الحجّه ماندري وش يجي فيها؟


شوال .. الله يرحمه .

ذا الحجة وذا القعدة ... يجي فيها خير ان شاء الله .

[الجوراسي]

عيضه الثبيتي


للصف الجيش حنّا نعرف الرجلي من الخيال=ندوس النار لو النار تحرق رجل واطيها
ترى كل الدول فيها التواصل صار بالجوال=يكود أربع دول ماني مسمّيها بأساميها


فيصل الرياحي

ترى الأعمال بالنيّات والنيّات بالأعمال=وبيت الشعر في بطنه رصاصه عاش راميها
ليا جاء فالسماء برق وصواقع تقطع الأرسال=لكن أخذ الهديه ودّها لو ما أنت راضيها




رائع رائع يالثبيتي شاعر عملاق بس قليل الظهور

محاورة قمة في الابداع

ومثل ماقال اخوي شمروخ المعنى حساس والتوظيف للمفردة كان جميلاً

تقبل تحياتي اخوي محارب الزلة وشكرا لك على طرح المحاورة

[علي الشهراني]

طريقة كشف المعنى من الشاعر الكبير الرياحي رحمه الله رائعه



الله يطول في عمر الحي و يرحم الميت



مشكووور على النقل

[مبارك مسفر الرقاص الحافي]

طريقة كشف المعنى من الشاعر الكبير الرياحي رحمه الله رائعه



الله يطول في عمر الحي و يرحم الميت



مشكووور على النقل

[محمد ابن رووق]

وقت مزاين الهيلا الملعبه

[شمروخ ابن عايد]

اتقان خطير لأحد مبادئ البلاغة وهو (( الذم بما يشبه المدح )) ولن أفصل في ذلك الا كإشارة في هذا البيت :


عسى ربي يعزّ بلادنا وآل السعـود ظـلال = وحنّا أهل البـلاد اللي تشرفنـا مباديهـا














كذلك توظيف ممتاز لمفردة الجوال ( الدالة على التجوال و الحركة والتغير بإستمرار ) والمقصد لمبدأ لم يكن حتى الآن هنا :

ترى كل الدول فيها التواصل صار بالجوال = يكود أربع دول مانـي مسمّيهـا بأساميهـا

[ابو فايح]

رحم الله ابو بدر رحمة واسعه


عيضه دائم رائع ولكن ظالم نفسه وظالم عنيبه والجمهور كافه بقلة ظهوره


سلمت يا محارب الزله على النقل الرائع

[شمروخ ابن عايد]

رحم الله ابو بدر رحمة واسعه


عيضه دائم رائع ولكن ظالم نفسه وظالم عنيبه والجمهور كافه بقلة ظهوره


سلمت يا محارب الزله على النقل الرائع



جمهور الغوغائية هو من يظلم الشعراء المبدعين .


وهناك شعراء عمالقة أنتهوا من الساحة تقريباً بفعل رغبات الجمهور العبثية واعطاء شعراء الاثارة والأكشن والحركات على المايكروفون والصوت الطربي فوق حقهم بكثير .

[فايز بن سرحان الثبيتي]

ترى كل الدول فيها التواصل صار بالجوال
يكود أربع دول مانـي مسمّيهـا بأساميهـا


الله اكبر يابو فيصل "



صح لسانه مليووووووون على هالـــجزاله

والله يرحم الرياحي ويسكنه فسيح جناته

محارب الزله بيض الله وجهك على هالنقل المتميز "

[اللسان الفصيح]

ولا ياثبيت ياللي تفعلون الطيب كيـف الحـال؟
انـا عنـدي هديّـه دوّروا لـي مـن يوديهـا

رحمك الله يابا بدر
واعتقد ان عيضه لم يوفق في الرد على هذا البيت
الذي هو بمثابة سؤال وهذا لايقلل من امكانيات ابو فيصل
واعتقد ان خبرة الرياحي رحمه الله لها دور في هذه التمريره


والدليل ان عيضه لم يوفق في الرد بيوت الرياحي التي تلت رد عيضه


ترى الأعمال بالنيّـات والنيّـات بالأعمـال
وبيت الشعر في بطنه رصاصه عاش راميها
ليا جاء فالسماء برق وصواقع تقطع الأرسال
لكن أخذ الهديه ودّها لو ما أنـت راضيهـا

مجرد وجهة نظر قابله للخطأ والصواب




سلمت يمينك يامحارب الزله على النقل





تقبلوا مروري

[شمروخ ابن عايد]

ترى كل الدول فيها التواصل صار بالجوال
يكود أربع دول مانـي مسمّيهـا بأساميهـا


الله اكبر يابو فيصل "



صح لسانه مليووووووون على هالـــجزاله

والله يرحم الرياحي ويسكنه فسيح جناته

محارب الزله بيض الله وجهك على هالنقل المتميز "


هدية الرياحي لم يلتفت لها الثبيتي في بداية الأمر وأستمر في معناه

(( ترى كل الدول فيها التواصل صار بالجوال
يكود أربع دول مانـي مسمّيهـا بأساميهـا ))


وكرر الرياحي هديته وأوضح طبيعة الهدية :

ليا جاء فالسماء برق وصواقع تقطع الأرسال
لكن أخذ الهديه ودّها لو ما أنـت راضيهـا












لكن علمني ياللسان الفصيح وش فهمت من هذه الهدية ؟؟ !

[حسن إبراهيم الدجيماء]

عيضه الثبيتي


ولا يافيصل العيّه عرفنا حيلة المحتال=هدايكم تبيها كاش والله ماندانيها
فيصل الرياحي

ياشاعر من قبيلة طيّبه ما في العلوم جدال=أخاطب لي رجالاً كلمتي تعرف معانيها



كلام كلام ..

الله يرحمك يابوبدر .. ويسكنك الجنه ..

ويحفظ عيضة المبدع صراحة والمتألق ..

مشكووور يامحااارب الزله .. لاهنت يالذيب ..!!!

[شمروخ ابن عايد]

وهي ليست مقلب ولاتمريرة ولاشئ , ولكنها هدية تخص المعنى .


وا،تظر اللسان الفصيح لمحاولة معرفة هذه الهدية .

[الثاقب]

صح السان عيضة ورحم الله الرياحي

[شمروخ ابن عايد]

ماعرفت الهدية يافصيح اللسان .


نبغى نعرفها من الثاقب يقول أنه يعرف لمعاني الشعراء .

[شمروخ ابن عايد]

الهدية من قبل الرياحي قال هنا , واراد ايصالها لعيضة الثبيتي :


ولا ياثبيت ياللي تفعلون الطيب كيـف الحـال؟ + انـا عنـدي هديّـه دوّروا لـي مـن يوديهـا





الثبيتي واصل معناه ولم يلفت النظر لهدية الرياحي أو يسال عنها أو يرد عليه في موضوع الهدية ( ربما لم ينتبه أو تجاهلها لأن المعنى أولى من الحديث الجانبي عند الثبيتي ) , وبتصوير شاعر متمكن ووضحت لكم بعض الضوء على مقصده :

ترى كل الدول فيها التواصل صار بالجوال = يكود أربع دول مانـي مسمّيهـا بأساميهـا





لكن الرياحي بث هديته مستغلاً قول عيضة في الجوال والاتصال فقال الرياحي :

ليا جاء فالسماء برق وصواقع تقطع الأرسال = لكن أخذ الهديه ودّها لو ما أنـت راضيهـا


وهديته هي النصيحة بإن يبتعد الثبيتي عن مثل هذه المعاني الحساسة , التي قد تقطع الارسال بينه وبين من يحب , وهذه هدية الرياحي النصح بالابتعاد عن مثل هذه المعاني .




ذكرت ذلك كتوضيح للأخ للسان الفصيح .




والسلام .

[شاكر الثبيتي]

محاوره رائعه