المساعد الشخصي الرقمي

مشاهدة النسخة كاملة : مفاتيح الكفر في داخل الكمّاش مكموشه ،،،، شليويح × مستور !! (حصرية)


سعود البرقاوي
03-Nov-2009, 02:09 PM
بعد الرجوع بالذاكرة الى ارشيف المحاورات التي لن تمر مرور الكرام وجدت هذه المحاورة
وأتمنى المعذرة لعدم توفر جزء من ردود احد الشعراء
علماً بأنها لم تنشر في كافة الوسائل الاعلامية وتعتبر حصرية لمنتديات الهيلا



شليويح المطيري


انا ويا العصيمي كيف ضعنا داخل الطوشه = وابو غليون ركب جمرته في راس غليونه
ورى بعض الاوادم يحسب ان الملعبة هوشه = سواة الموتر اللي سايقه يِلعب دركسونه


مستور العصيمي


ليا صلعت راسك عندنا ندهن لك الشوشه = والا ياربع ابن شلاح قولوا له على هونه
انا ماني براعي بيعةٍ فالسوق مغشوشه = أعرفها واصرفها تجي وتروح مزيونه

شليويح المطيري



بعد حنا كتبنا لك حروف الخط منقوشه = (............................................)
(.............................................)=(. ..............................................)

مستور العصيمي


تلبّس من ثياب بالعطر والعود مرشوشه = يابن شلاح لاترجع غليص اللي يقولونه
دخلنا في بيوت من خيار الزل مفروشه = وحطينا الامانة في يدين رجال مامونه

شليويح المطيري


عليك الظلة اللي دون عين الشمس منكوشه = وانا خايف عليك من المطر لاهلّت مزونه
لقينا جدة المجنون مجنونه ومربوشه = وانا ماني مفتّش قشها في وسط كرتونه

مستور العصيمي


لقيت الحاجة اللي عند ابن شلاح مخشوشه = ماغير يشيلها ويحطها ويقول ملعونه
لك الله مانخلي لك ياكود عظام معروشة = ولو خلصت روحك يوم ثاني يوم مديونه

شليويح المطيري


حصاة الزلزلة ماتزعل الا خشم نتّوشة = وانا خابرك طيب والحرامي تكحل عيونه
قنصنا للنعامة وإنّها بالملح ممحوشه = من سلاح العيال اللي قطرها مايخونونه

مستور العصيمي


تبات الناس عنك بعيد تصبح منك ملبوشه = واثر كبدك عليهم من قديم الوقت مغبونه
جمال عقيل مرت مع مفيض الريع محيوشه = وراعيها يدوّر للتمر في راس عرجونه

شليويح المطيري


علامك يالرحى خليتها كسره ومجروشه = يبا يدخل ويطلع حبنا صافي على لونه
مفاتيح الكفر في داخل الكمّاش مكموشه = تداير فالكفر يومين وازريتوا تفكونه

مستور العصيمي


دوربك كلها شوك وحصى ماهيب مبروشه = تقول انك هذاك اللي يهد الضلع بقرونه
عيونك ليتها في غرفة الدكتور منقوشه = كما انك ماتشوف الدرب مثل اللي يشوفونه

شليويح المطيري


اقص حجارة الضبان والضبان منخوشه = سواويقٍ ليا شافوا لهم جحرٍ يحفرونه

عيد بن مرضي
03-Nov-2009, 02:18 PM
الله الله


شعارين قمه في فن المحاوره



لاهنت ياسعود على الأختيار الجزل

ابو فايح
03-Nov-2009, 04:07 PM
الله الله ابداع من الشاعرين واعتقد انه حصل قبل طاروق حدث ما


لاهنت ياسعود على النقل الحصري وبانتظار جديدك

سلطان ابن حامد
03-Nov-2009, 04:12 PM
اللــــــــــــــــــــــــــــــه اللــــــــــــــــــــــــــــــه


الله يبيّض وجهك يا سعود

عز الله انك نجملت فينا اليوم : )

تقديري لك ،،

الباااسل
03-Nov-2009, 06:57 PM
ياسلام على النقل الرائع



لاهنت ياسعود

عبدالله المطرفي الهذلي
03-Nov-2009, 10:18 PM
هذي كانت في القصيم وكان قبل هالطاروق طاروق بين خليف بن دواس ومطلق الثبيتي والطاروق هذا بدى على المعنى بسبب خليف ومطلق جاء بينهم قاااف يهول والسالفه اطول لكن عطيتكم خيط القضيه ههههههه

شامان العتيبي
04-Nov-2009, 09:20 AM
بيض الله وجهك ياسعود


على النقل الرائع

ابن عتيبه البار
04-Nov-2009, 02:44 PM
الله يطول أعمارهم ويصح السنتهم


بيض الله وجهك عل حسن الاختيار ياسعود